ត្រឹមរយៈពេល ៥ខែដើមឆ្នាំ២០២១នេះ មហាជនអ្នកលេងបណ្តាញសង្គម ហាក់មានការភ្ញាក់ផ្អើល និងទទួលបានការចាប់អារម្មណ៍ជាខ្លាំង ចំពោះរឿងរ៉ាវវិវាទរបស់ឧកញ៉ាៗ ៦រូប ដែលជួបរឿងអាស្រូវគ្រួសារ ស្នេហា និងបញ្ហាសង្គម។
សូមចុច Subscribe Telegram oknha_news ដើម្បីទទួលបានព័ត៌មានគ្រប់សកម្មភាពឧកញ៉ា អាជីវកម្ម ចែករំលែក ជោគជ័យ
១.លោកជំទាវឧកញ៉ា អ៊ាន សៀវម៉ី
កាលពីរសៀលថ្ងៃទី២៦ ខែមករា ឆ្នាំ២០២១ សមត្ថកិច្ចបានចុះទៅចាប់ខ្លួនឧកញ៉ា អ៊ាន សៀវម៉ី នៅផ្ទះវីឡាមួយកន្លែង ក្នុងបូរីមូនថោន នៅភូមិគោកចំបក សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ជាប់ពាក់ព័ន្ធបណ្ដឹងបរិហាកេរ្ដិ៍។ ប៉ុន្ដែការចាប់ខ្លួនមិនបានសម្រេចឡើយ ដោយឧកញ៉ា អ៊ាន សៀវម៉ី បានគេចចេញពីផ្ទះរបស់ខ្លួន ដូច្នេះបន្ទាប់ពីឡោមព័ទ្ធផ្ទះអស់ជាច្រើនម៉ោង និងរកមិនឃើញឧកញ៉ា អ៊ាន សៀវម៉ី កម្លាំងរបស់នាយកដ្ឋាននគរបាលព្រហ្មទណ្ឌ បានសម្រេចដកចេញមកវិញ។
នៅថ្ងៃសុក្រទី២៩ខែមករាឆ្នាំ២០២១ លោកជំទាវឧកញ៉ា អ៊ាន សៀវមុី បានចូលខ្លួនមកបំភ្លឺនៅតុលាការរាជធានីភ្នំពេញ ក្រោយពីការសាក់សួរតុលាការសម្រេចឲ្យឧកញ៉ា អ៊ាន សៀវមុី ត្រឡប់ទៅគហេដ្ឋានវិញ។ រឿងរ៉ាវដែលនាំឲ្យកើតជាការប្តឹងផ្តាល់ទៅតុលាកានោះគឺដើមចមដោយសារតែឧកញ៉ាអ៊ាន សៀវម៉ី បានឡាយតាមបណ្តាញសង្គមហ្វេសប៊ុក ជេប្រមាតទៅលើក លោកស្រី ទ្រី ដាណា ទើបគាត់សម្រេចចិត្តដាក់ពាក្រប្តឹងទៅតុលាការ។
២.អតីតឧកញ៉ា ឌួង ឆាយ
អតីតភរិយា លោក ឌួង ឆាយ គឺអ្នកស្រី ដេត មាលីណា បានបង្ហោះវីដេអូដែលយកមកពីកាមេរ៉ាសុវត្ថិភាព ពីសកម្មភាពអតីតស្វាម៉ី បានប្រើអំពើហិង្សាមកលើខ្លួនកាលពីខែធ្នូ ឆ្នាំ២០២០ ក្នុងចេតនា ដើម្បីបកស្រាយការពិត និងទាមទារនូវយុត្តិធម៌។
ក្រោយបែកធ្លាយវីដេអូបង្ហាញពីសកម្មភាពប្រើអំពើហិង្សាលើអតីតភរិយា ឧកញ៉ា ឌួង ឆាយ ដែលជាកូនប្រុសបង្កើតរបស់ឧកញ៉ា ឌួង ងៀប ត្រូវបានប្រមុខរដ្ឋស្តីទី លោក សាយ ឈុំ សម្រេចបញ្ចប់មុខងារជាឧកញ៉ា។
យ៉ាងណាកាលថ្ងៃទី១៦ ខែមីនា លោក ដួង ឆាយ បានបំភ្លឺអំពីវីដេអូបែកធ្លាយនោះថា មុននឹងឈានដល់ការប្រើអំពើហិង្សាបែបនេះ គឺមានហេតុផលខ្លះដែលអតីតភរិយាគាត់មានចេតនាញុះញង់ឲ្យគាត់ខឹងក្នុងបំណងដើម្បីថតវីដេអូនេះទុក ដែលបានប្រើពាក្យមិនសមរម្យ និងជេរប្រមាថលើក្រុមគ្រួសាររបស់លោកជាដើម។
ទោះបីជាយ៉ាងនេះក្តីក្រសួងកិច្ចការនារី ក៏បានចេញសេចក្តីថ្លែងការណ៍មួយ ដោយថ្កោលទោសលោក ឌួង ឆាយ ចំពោះការប្រើអំពើហិង្សាក្នុងគ្រួសារ លើអតីតភរិយារបស់ខ្លួន។ ក្រសួងបានចាត់ទុកអំពើហិង្សាគ្រប់ទម្រង់និងគ្រប់រូបភាពណាក៏ដោយ ជាអំពើមិនអាចទទួលយកបាន ហើយក៏មិនអាចអត់ឱនឱ្យបានដែរ។
រីឯជនរងគ្រោះ កូន និងអ្នកពាក់ព័ន្ធ ត្រូវទទួលបានកិច្ចការពារដោយច្បាប់និងសង្គម ហើយអ្នកដែលប្រព្រឹវទទួលខុសត្រូវចំពោះមុខច្បាប់។
៣.លោកឧកញ៉ា ប៉ែន លឹម
លោក ប៉ែន លឹម បានប្រើប្រាស់ស្លាកលេខមិនត្រឹមត្រូវបំពាក់រថយន្ត របស់ខ្លួនម៉ាក Highlander ពណ៌ស ដោយដាក់ថា «កម្ពុជា ឯកឧត្តម ឧកញ៉ា ប៉ែន លឹម»និងបានប្រើប្រាស់ពាក្យសម្តីជេរប្រមាថគេឯងពេញបណ្តាញសង្គមហ្វេសបុក។
នៅម៉ោង៤រសៀល ថ្ងៃទី២៤ ខែមេសា ឆ្នាំ២០២១ លោកត្រូវបានសមត្ថកិច្ចនគរបាលខណ្ឌឬស្សីកែវ ធ្វើការកោះហៅដើម្បីឲ្យចូលខ្លួនមកបំភ្លឺ ចំពោះមុខសមត្ថកិច្ច ក៏បានទទួលស្គាល់នូវកំហុសខុសឆ្គងរបស់ខ្លួន និងបានដោះស្លាកលេខមិនត្រឹមត្រូវនេះចេញ ដោយបានធ្វើកិច្ចសន្យា និងសុំទោសជាសារណ:ចំពោះការពាក់ស្លាកលេខមិនត្រឹមត្រូវនេះ ហើយក៏បានធ្វើការថតជាវិដេអូសុំទោសជាសាធារណ: ចំពោះការប្រើប្រាស់ពាក្យសម្តីមិនសមរម្យនៅលើបណ្តាញសង្គម។
លោក ប៉ែន លឹម មានអាយុ៤៩ឆ្នាំ មុខរបរនៅផ្ទះ រស់នៅសង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ។
៤.លោកឧកញ៉ា ហេង សៀ
ជម្លោះរវាងឧកញ៉ា ហេង សៀ និងពិធីការិនី មាន ពេជ្ររីតា បានធ្វើឱ្យអ្នកប្រើប្រាស់បណ្តាញសង្គមជាច្រើន មានការចាប់អារម្មណ៍យ៉ាងខ្លាំង ក្រោយពីឃើញវីដេអូរបស់កញ្ញា មាន ពេជ្ររីតា យំត្អូញត្អែររៀបរាប់ពីការបៀតបៀនរាងកាយនាងពីសំណាក់ឧកញ៉ា ហេង សៀ កាលពីថ្ងៃ៤ ខែឧសភា។
លោកឧកញ៉ា ហេង សៀ បានដាក់ពាក្យប្តឹងពិធីការិនីស្ថានីយ៍ទូរទស្សន៍ My TV កញ្ញា មាន ពេជ្ររីតា ពីបទ « លួចមានស្ថានទម្ងន់ទោស » កើតឡើងកាលពីថ្ងៃទី៤ ខែឧសភាឆ្នាំ២០២១ វេលាម៉ោង១៥.០៦នាទី នៅចំណុចផ្លូវលេខ១៣៨ កែងផ្លូវលេខ២៥៩ ក្រុមទី២៨ ភូមិ១០ សង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ។
ចំពោះមូលហេតុដែលនារីឈ្មោះ យូប៊ី អាចលួចទូរស័ព្ទពីឧកញ៉ាបាន ដោយសារតែពួកគេកន្លងទៅមានទំនាក់ទំនងជិតស្និទ្ធស៊ីជម្រៅនឹងគ្នា ទើបស្ត្រីឈ្មោះយូប៊ីអាចឆ្លៀតឧកាសលួចយកទ្រព្យរបស់ឧកញ៉ា ហេង សៀ បាន។
ភ្លាមៗ ពិធីការិនីទូរទស្សន៍ My TV កញ្ញា មាន ពេជ្ររីតា បានដាក់ពាក្យបណ្តឹងតបទៅលោក ឧកញ៉ា ហេង សៀ ពីបទប៉ុនប៉ងរំលោភរូបនាងក្នុងរថយន្ត នៅម្តុំផ្សារគីឡូម៉ែត្រលេខ ៤ ជិតសាកលវិទ្យាល័យ អាស៊ីអឺរ៉ុប កាលពីថ្ងៃទី៤ ខែឧសភា ឆ្នាំ២០២១ និងទាមទារសំណងជំងឺចិត្តចំនួន ១០ ម៉ឺនដុល្លារ (១០០,០០០) ព្រមទាំងការខាតបង់ និងខូចខាតពេលវេលា និងសេវាផ្លូវច្បាប់ចំនួន ១ ម៉ឺនដុល្លារ។
ជុំវិញករណីទំនាស់ រវាងឧកញ៉ា ហេង សៀ និងកញ្ញា មាន ពេជ្ររីតា ពិធីការិនី ទូរទស្សន៍ My TV រហូតដល់មានការប្តឹង ចោទប្រកាន់គ្នា ទៅវិញទៅមក ក្នុងនោះ ភាគីឧកញ៉ា ហេង សៀ បានប្តឹងកញ្ញា មាន ពេជ្ររីតា ទាក់ទងនឹងការបង្ករបួសស្នាម និងការលួចយកទូរស័ព្ទ ។ ចំណែកឯ កញ្ញា មាន ពេជ្ររីតា បានចោទប្រកាន់ ឧកញ៉ា ហេង សៀ ថាបានប៉ុនប៉ងរំលោភ សេពសន្ថវៈ លើរូបនាង។ គិតមកដល់ពេលនេះសំណុំរឿងខាងលើមិនទាន់បានចេញជាផ្លែផ្កានៅឡើយទេ។
៥.លោកឧកញ៉ា ឃន ឈុនដារ៉ា
កូនប្រសាឧកញ៉ា ហេង សៀ ឧកញ៉ា ឃន ឈុនដារ៉ា និងភរិយាគឺលោកស្រី តាំង គឹមហៀង ត្រូវបានចាប់ខ្លួនពីបទជួលមនុស្សប្រុស-ស្រីថតរូបអាសអាភាស ដើម្បីបំភាន់ និងបំផ្លាញកិត្តិយសកញ្ញា មាន ពេជ្ររីតា កាលពីយប់ថ្ងៃទី១៥ ខែឧសភា ឆ្នាំ២០២១។
ក្រោយពីតុលាការសហការជាមួយមន្ត្រីនគរបាលយុត្តិធម៌ ធ្វើការស្រាវជ្រាវលើ ឈ្មោះ ឃន ឈុនតារា និងឈ្មោះ តាំង គឹមហៀង ដែលត្រូវជាកូនប្រសារនិងកូនបង្កើតរបស់ឧកញ៉ា ហេង សៀ ចំនួន២ថ្ងៃ ពួកគេទាំងពីរនាក់បានសារភាពថា ខ្លួនពិតជាបានជ្រើសរើសមនុស្សប្រុសម្នាក់និងស្រីម្នាក់ដែលមានភិនភាគប្រហាក់ប្រហែលនឹងកញ្ញា មាន ពេជ្ររីតា និងឈ្មោះ ហេង សៀ ដើម្បីថតសម្តែងអង្គហេតុនៃជម្លោះដែលកើតមានឡើងលើកញ្ញា មាន ពេជ្ររីតា និងឈ្មោះ ហេង សៀ នៅក្នុងរថយន្តកើតហេតុ ព្រមទាំងមានវីដេអូឃ្លីបធ្វើត្រាប់តាមអង្គហេតុក្នុងរថយន្តផងដែរ ប៉ុន្តែពុំឃើញមានភស្តុតាងផលិតវីដេអូឃ្លីបអាសអាភាសឬរូបភាពអាសអាភាសដែលត្រូវបានចែកចាយក្នុងសង្គមឡើយ។
ករណីនេះ តុលាការសម្រេចដោះលែងឈ្មោះ ឃន ឈុនតារា និងឈ្មោះ តាំង គឹមហៀង ឱ្យមានសេរីភាពវិញនៅរសៀលថ្ងៃទី១៧ ខែឧសភា នេះ ក្រោយពីពួកគេធ្វើលិខិតសុំទោសជាសាធារណៈ ពាក់ព័ន្ធនឹងការចែកចាយរូបអាសអាភាសដែលមិនមានប្រភពច្បាស់លាស់នៅក្នុងបណ្តាញសង្គម WhatsApp និង Telegram ឱ្យទៅមនុស្សចំនួន៧នាក់។
៦.លោកឧកញ៉ា ឌួង ងៀប
លោកជំទាវ ខុង លីស៊ីអាណា ដែលត្រូវជាម្ដាយបង្កើតរបស់ លោកឧកញ៉ា ឌួង ឆាយ កាលពីរសៀលថ្ងៃទី១៤ ខែឧសភា បានធ្វើសន្និសីទសារព័ត៌មានមួយ ស្ដីពីការស្នើសុំទៅខាងស្ថានប័នពាក់ព័ន្ធ បន្តស្វែងរកយុត្តិធម៌សម្រាប់លោកជំទាវផ្ទាល់ រួមទាំងកូនប្រុសលោក ឌួង ឆាយ។
លោកស្រី ខុង លីស៊ីអាណា ឱ្យដឹងថា ស្វាមីរបស់ខ្លួនមិនបានភ្ញាក់រលឹកដឹងកំហុសខ្លួនបានធ្វើខុសយ៉ាងធ្ងន់ធ្ងរចំពោះកូន ឌួង ឆាយ ហើយថែមទាំងប្ដឹងលែងលះលោកស្រី និងជំរុញតុលាការឱ្យកោះហៅលោកស្រីជាលើកទី២ដើម្បីចូលខ្លួនទាញហេតុផលដើម្បីលែងលះ។
នៅព្រឹកថ្ងៃទី១៩ ខែឧសភា ឆ្នាំ២០២១នេះ លោកឧកញ៉ា ឌួង ងៀប និងលោកជំទាវ ខុង លីស៊ីអាណា បានទៅកាន់តុលាការតាមដីកាកោះហៅដើម្បីលែងលះ ប៉ុន្តែពុំបានសម្រេចឡើយ ដោយសារភាគីខាងប្រពន្ធមិនយល់ព្រម។
ឧកញ៉ា ឌួង ងៀប នៅព្រឹកថ្ងៃទី២២ ខែឧសភា ឆ្នាំ២០២នេះ បានចេញមកបំភ្លឺរឿងរ៉ាវជម្លោះគ្រួសារអភិជន ដែលកំពុងប្តឹងផ្តល់គ្នាឡើងតុលាការ លោកថា មូលហេតុដែលខ្ញុំចាកចេញពីផ្ទះនោះដោយភរិយាបានដាក់ចេញនូវបទបញ្ជាថ្មី ដើម្បីគ្រប់គ្រងរូបខ្ញុំ មានពេលមួយខ្ញុំគ្រាន់តែទៅខេត្តតែមួយយប់ទេ ហើយខ្ញុំត្រឡប់មកផ្ទះវិញ ខោអាវ និងសម្ភារៈរបស់ខ្ញុំប្រើត្រូវបានគាត់ប្រើឱ្យកូនចៅយកទៅដុតកម្ទេចចោលអស់ព្រមទាំងបង្ហោះវិីដេអូទៀត ។
សូមជម្រាបជូថា គិតមកដល់ថ្ងៃទី៣១ ខែឧសភា នេះ សំណុំរឿងប្តឹងផ្តល់លែងលះរបស់ភរិយាលោកស្រី ខុង លីស៊ីអាណា ជាមួយលោកឧកញ៉ា ឌួង ងៀប កំពុងស្ថិតក្នុងដៃតុលាការនៅឡើយ៕
