បើនិយាយដល់រឿងកីឡាកាស អ្នកណាដែលថាមិនស្គាល់ John Cena នោះ ជាពិសេសគឺរាល់មុនពេលប្រើក្បាច់ចុងក្រោយ ឬនិយមហៅថា ចូល Super គេរមែងនិយាយថា You Can’t See Me។
កាលពីពេលថ្មីៗនេះ ទំហំទ្រព្យសម្បត្តិរបស់ John Cena គឺមានប្រហែល ៦០ លានដុល្លារអាមេរិក ហើយទំហំទឹកប្រាក់ធំសម្បើមនេះ មិនមែនបានមកតែពីអាជីពជាអ្នកកីឡាកាសឡើយ ពោលគឺគេនៅមានអាជីវកម្មផ្សេងពីនេះទៀត។
ខាងក្រោមគឺជាមុខរបរផ្សេង រាប់ទាំងអាជីពជាអ្នកកីឡាកាសរបស់ Cena៖
អាជីពជាកីឡាកាស
John Cena ធ្លាប់ទទួលងារជាកីឡាកាស WWEស៊ីថ្លៃឈ្នួលថ្លៃបំផុតកាលពីឆ្នាំ ២០១៦ បើផ្អែកតាមរបាយការណ៍ពី Forbes។ ដូចទៅនឹងកីឡាកាសល្បីៗផ្សេងទៀតដែរ Cena រកចំណូលបន្ថែមបានក្រាស់ក្រែលតាមរយៈការផ្សាយពាណិជ្ជកម្ម និងការបោះពុម្ពអាវ ខ្សែក ហើយបច្ចុប្បន្ន គេថែមទាំងជាអ្នកនិពន្ធសៀវភៅកូនក្មេងលក់ដាច់បំផុតទៀតផង។
អាជីពវិស័យភាពយន្ត
អ្នកកីឡាកាសខាងលើបង្ហាញខ្លួនជាលើកដំបូង នៅក្នុងភាពយន្ត The Marine កាលពីឆ្នាំ ២០១៦ ដែលគ្រានោះ គេទទួលបាន ២៨០ ០០០ ដុល្លារអាមេរិក ក្នុងការដើរតួជាតួឯក។
តែក្រោយមក Cena ទទួលបានត្រឹម ២៥ ០០០ ដុល្លារអាមេរិកប៉ុណ្ណោះ ក្នុងតំណែងជាឪពុកតួឯកនៃរឿង Fred: The Movie និងក្រោយមកបាន ៣០ ០០០ ដុល្លារអាមេរិកសម្រាប់រឿង Fred 3 នេះបើតាមការចុះផ្សាយពី Money Nation។
យ៉ាងណាមិញ កាលពីពេលថ្មីៗនេះ បុរសវ័យ ៤៤ ឆ្នាំ ហាក់ឡើងកូដខ្លាំង ពោលគឺ បានបង្ហាញខ្លួនក្នុងសែស្រឡាយភាពយន្តលំដាប់ពិភពលោក Fast and Furious វគ្គ ៩ ឬហៅកាត់F9 Suicide Squad និងថែមជាពិធីករនៃកម្មវិធីល្បីឈ្មោះ Wipeout ដែលយើងនិយមហៅថា ល្បែងធ្លាក់ទឹក។
ការធ្វើពាណិជ្ជកម្មជាមួយក្រុមហ៊ុនល្បីៗ
ចំណូលប្រមាណ ១,៥ លានដុល្លារអាមេរិក ហូរចូលហោប៉ៅរបស់ John Cena យ៉ាងផុយជារៀងរាល់ឆ្នាំ ដែលវាគឺបានមកពីការចុះកុងត្រាផ្សាយពាណិជ្ជកម្ម ជាមួយក្រុមហ៊ុនល្បីៗ ដូចជា Subway, Honda និង Gillette ជាដើម។
មិនត្រឹមតែប៉ុណ្ណោះ ក៏លឺល្ហៀងៗទៀតថា John Cena អាចទទូលបានចន្លោះពី ៥សែន ទៅ១លានដុល្លារអាមេរិក សម្រាប់តែការផ្សាយពាណិជ្ជកម្មតែមួយផលិតផលក្នុងឆ្នាំ ២០២០។
ការវិនិយោគលើវិស័យអចលនទ្រព្យ
ដូចទៅនឹងអ្នកមានលំដាប់ៗដែរ Cena មិនរំលងឡើយសម្រាប់ការវិនិយោគលើវិស័យអចលនទ្រព្យ ដោយរូបគេមានផ្ទះយ៉ាងតិច ២ កន្លែងនៅសហរដ្ឋអាមេរិក ដោយគេដឹងថា លោកមានផ្ទះមួយនៅ Land O’Lakes រដ្ឋ Florida ដែលមានបន្ទប់គេង ៥ បន្ទប់ទឹក ៤ បំពាក់ជាមួយអាងហែលទឹកទាំងខាងក្នុង និងខាងក្រៅផ្ទះ។ ប្រសិនបើអ្នកបានតាមដានកម្មវិធី Total Bellas អ្នកប្រាកដជាបានដឹងថា John Cena ចាយលុយជាង ៣,៦ លានដុល្លារអាមេរិក ដើម្បីកែតម្រូវ និងជួសជុលឡើងវិញ ក៏ដូចជាធ្វើដើម្បីបង្កើនតម្លៃផ្ទះផងដែរ។
ក្រៅពីមានចំណូលច្រើនពីអាជីវកម្មខាងលើ Cena ក៏ត្រូវបានស្គាល់ថាជាអ្នកស្រឡាញ់យានជំនិះដែលមានប្រព័ន្ធដំណើរការខ្លាំង ហើយគេជឿថា លោកមានយានជំនិះច្រើនជាង ២០ ដែលខ្លះគឺមានតែមួយប៉ុណ្ណោះក្នុងលោក។
ក្នុងចំណោមរថយន្តទាំងអស់ ក៏មាននូវរថយន្តម៉ាក Corvette ម៉ូដែល InCenaRator ដែលវាគឺត្រូវបានរចនាដោយខ្លួនលោកផ្ទាល់ ហើយក៏មាន Rolls Royce ផងដែរ ដោយតម្លៃរបស់វាគឺប្រមាណ ជាង ៤ សែនដុល្លារអាមេរិក៕
ប្រភព: SCMP
