មហាសេដ្ឋីទូទៅរមែងតែងមានទម្លាប់មួយដូចៗគ្នា នោះគឺការទិញរថយន្តកំពូលៗមកដាក់តាំង ឬយើងនិយមហៅថាមានចំណូលចិត្តសន្សំរថយន្តទុក។ ដោយឡែក លោក Gautam Singhania ដែលជាសេដ្ឋីឥណ្ឌា និងសព្វថ្ងៃជាប្រធាន និងជានាយកគ្រប់គ្រងក្រុមហ៊ុនផលិតក្រណាត់ធំបំផុតក្នុងលោក India’s Raymond Group ក៏មានចំណូលចិត្តដូចនឹងមហាសេដ្ឋីផ្សេងៗដែរ។
ជាមួយនឹងទំហំទ្រព្យសម្បតិ្តដ៏សម្បើម ១,៤ ពាន់លានដុល្លារអាមេរិក លោកអាចជះលុយទិញឡានទំនើបៗបានច្រើនរាប់មិនអស់ ហើយដោយសារស្រឡាញ់យានជំនិះខ្លាំងពេក លោកបានបង្កើតក្រុមឡានទំនើបដំបូងនៅឥណ្ឌាទៀតផង។
បើតាមការចុះផ្សាយពី The Economic Times បានឲ្យដឹងថា ចំនួនឡានដែល Singhania កាន់កាប់គឺមិនត្រូវបានស្គាល់ពីចំនួនជាក់លាក់ឡើយ ដោយគេគ្រាន់តែដឹងថា មានឡានទំនើប ៦ ប្រភេទដែលមហាសេដ្ឋីវ័យ ៥៥ ឆ្នាំរូបនេះតែងបង្ហោះរូបភាពនៅលើបណ្ដាញសង្គម Instagramផ្ទាល់ខ្លួនជាញឹកញយ។
ខាងក្រោមនេះ គឺជាឈ្មោះរបស់រថយន្តទាំង ៦ ប្រភេទដែលគ្រប់គ្រងដោយមហាសេដ្ឋីខាងលើ៖
Hot Rod
ជាប្រភេទរថយន្តស៊េរីបុរាណដែលត្រូវបានយកមកកែច្នៃឡើងវិញ ហើយគេមិនស្គាល់ច្បាស់អំពីឆ្នាំផលិតនៃរថយន្តមួយនេះឡើយ។
Ferrari 348 GTB
ច្បាស់ណាស់ តើមហាសេដ្ឋីរូបណាដែលថាមិនមានឡានម៉ាក Ferrari នោះ? គេដឹងថា Singhania មានរថយន្ត ប្រភេទ Ferrari ច្រើនជាង ១០ គ្រឿង តែលោករមែងបង្ហោះរូបភាព Ferrari 348 GTB ញឹកញាប់ជាងគេ។
Lamborghini Gallardo
ចំណែកមួយប្រភេទនេះវិញ វាត្រូវបានគេដឹងថា កុម្ម៉ង់ជាពិសេសដោយមហាសេដ្ឋីខាងលើ ដោយកម្លាំងម៉ាស៊ីនរបស់វាគឺ មានកម្លាំងខ្លាំងជាង 550 bhp ។
Vintage Mustang
យោងតាមការចុះផ្សាយរបស់ CarToq បានឲ្យដឹងថា រថយន្តមួយនេះត្រូវបានកែច្នៃជាពិសេស សម្រាប់ការប្រណាំងបែប Drag Racing (ការប្រណាំងតែ ២ ឡាន) ដោយបំពាក់នូវឧបករណ៍គាំទ្រកង់ខាងក្រោយជាពិសេស។
Nissan Skyline GT-R
ចូលមកដល់ប្រភេទនេះវិញ អាចចាត់ទុកថាជាកំពូលរថយន្តមួយលើលោក ដ្បិតវាមានកម្លាំងម៉ាស៊ីនដល់ទៅ ១០០០ កម្លាំងសេះ និងអាចរត់ពីកុងទ័រ ០ ដល់ ១០០ គម/ម៉ោង ដោយប្រើរយៈពេលត្រឹម ២.៥ វិនាទីប៉ុណ្ណោះ។
Ariel Atom
សម្រាប់ម៉ូដែលចុងក្រោយនេះវិញ វាត្រូវបានគេសន្និដ្ឋានថា មានតម្លៃប្រមាណ ១៤៨ ០០០ ដុល្លារ ដោយភ្ជាប់មកជាមួយប្រភេទម៉ាស៊ីន V8 និងអាចរត់ពីកុងទ័រ ០ ដល់ ១០០ គម/ម៉ោង ដោយចាយពេលត្រឹម ២,៣ វិនាទីប៉ុណ្ណោះ៕
ប្រភព: SCMP
