ក្រុមហ៊ុនអភិវឌ្ឍភ្នំថ្កូវ ត្រូវបានក្រសួងរ៉ែនិងថាមពល សម្រេចផាកពិន័យជាប្រាក់ ៨២១ ១៧១ ០០០រៀល ស្មើនិង ២០៥ ៣១៨ដុល្លារអាមេរិក នៅក្នុងសំណុំរឿងលួចធ្វើអាជីវកម្ម មុនពេលមានអាជ្ញាប័ណ្ណនិងច្បាប់អនុញ្ញាត ស្ថិតនៅភូមិកោះផ្ដៅ ឃុំកំពង់ត្រាចខាងលិច ស្រុកកំពង់ត្រាច ខេត្តកំពត។
ឯកសារកម្រាស់ពីរទំព័រដែលចុះហត្ថលេខាដោយរដ្ឋមន្ត្រីក្រសួងរ៉ែនិងថាមពល លោក ស៊ុយ សែម ជម្រាបទៅកាន់ប្រធានក្រុមហ៊ុនអភិវឌ្ឍភ្នំថ្កូវ លោក អេង អូន កាលពីថ្ងៃទី២៩ ខែមិថុនា ឆ្នាំ២០២១ ។
សូមចុច Subscribe Telegram oknha_news ដើម្បីទទួលបានព័ត៌មានគ្រប់សកម្មភាពឧកញ៉ា អាជីវកម្ម ចែករំលែក ជោគជ័យ
ក្នុងលិខិតខាងលើបញ្ជាក់ថា៖ ក្នុងករណីដែលក្រុមហ៊ុនយឺតយ៉ាវ ឬមិនព្រមបង់ប្រាក់ពិន័យតាមកាលកំណត់ ក្រសួងរ៉ែនិងថាមពល នឹងបញ្ឈប់ការផ្ដល់អាជ្ញាប័ណ្ណអោយក្រុមហ៊ុនតាមការស្នើសុំ។
ក្រសួងរ៉ែ និងថាមពលបន្ថែមថា ក្រុមហ៊ុនបានកាយយកអាចដីក្រហមមុនទទួលបានអាជ្ញាប័ណ្ណអស់បរិមាណចំនួន ៥១ ៣២៩,៥០ម៉ែត្រគូប ល្មើសនិងមាត្រា៣៥ថ្មី នៃច្បាប់ស្ដីពីវិសោធនកម្មនៃច្បាប់ស្ដីពីការគ្រប់គ្រងអាជីវកម្មធនធានរ៉ែ ត្រូវរងការផាកពិន័យចំនួនស្មើនិង២ដងនៃចំនួនប៉ាន់ស្មានលើផលិតផលរ៉ែ ដែលបានជីកយកស្មើនិងទឹកប្រាក់ ៨២១ ២៧២ ០០០រៀល។
ក្រសួងទុករយៈពេល១៥ថ្ងៃគិតពីថ្ងៃចុះហត្ថលេខានេះតទៅ ដើម្បីឲ្យក្រុមហ៊ុនតវ៉ាជាលាយល័ក្ដអក្សរ ផុតពីនេះក្រសួងនិងចេញលិខិតធ្វើការផាកពិន័យពុំទុកពេលតវ៉ទៀតឡើយ និងសម្រេចផាកពិន័យដូចខាងក្រោម៖
កំណត់យកតម្លៃប៉ាន់ស្មានដីក្រហមស្មើ ៨ ០០០ ក្នុង១ម៉ែត្រត្រីគុណ ។
៨ ០០០ គុណនិង ៥១ ៣២៩.៥០គុណ២ ស្មើ ៨២១ ២៧២ ០០០ រៀល ។
ប្រភពព័ត៌មានពីក្រសួងរ៉ែនិងថាមពល បានឲ្យដឹងថា ទោះបីមានការព្រមានធ្ងន់ៗ តែក្រុមហ៊ុនអភិវឌ្ឍភ្នំថ្កូវរបស់លោក អេង អូន នៅមិនទាន់បង់ប្រាក់ពិន័យទេ ថែមទាំងមានចេតនាគេចវេះការទទួលខុសត្រូវបង់ពន្ធទៀតផង។ ខណៈដែលលោក អេង អូន ត្រូវបានគេស្គាល់ថា ជាមន្ត្រីយោធានៅមូលដ្ឋានទ័ពអាកាសកងកេង ខេត្តព្រះសីហនុ និងជាប្រធានក្រុមហ៊ុនអភិវឌ្ឍ ភ្នំថ្កូវ ស្រុកកំពង់ត្រាច ខេត្តកំពត៕
