លោកជំទាវឧកញ៉ា នឹម វណ្ណ: បានបង្ហាញទឹកចិត្តដ៏ប្រពៃ ដោយប្រកាសជួយទិញមៀនប៉ៃលិន របស់បងប្អូនប្រជាកសិករខ្មែរយើងចំនួនជិត ៣តោន ដើម្បីយកមកជូនខណ្ឌទាំង ១២ និងអង្គការកុមាកំព្រា ព្រមទាំងសិល្បករផងដែរ បន្ទាប់ពីលោកជំទាវបានមើលឃើញពីបញ្ហាប្រឈម និងហានិភ័យរបស់បងប្អូនប្រជាកសិករ ដែលបានប្រមូលផលហើយ តែមិនអាចនាំចេញយកទៅលក់ទៅប្រទេសថៃបាន ។
សូមចុច Subscribe Telegram oknha_news ដើម្បីទទួលបានព័ត៌មានគ្រប់សកម្មភាពឧកញ៉ា អាជីវកម្ម ចែករំលែក ជោគជ័យ
ក្នុងនោះដែរលោកជំទាវឧកញ៉ា នឹម វណ្ណា បានមានប្រសាសន៍ថា៖ ការទិញមៀនប៉ៃលិននេះ គឺជាការចូលរួមចំណែកជួយគាំទ្រដល់ប្រជាកសិករ និងផលិតផលខ្មែរក្នុងស្រុក ឲ្យមានតម្លៃនិងជួយសង្គ្រោះផលិតផលរបស់យើង ដែលកំពុងជួបហានិភ័យ និងជួយសម្រួលដល់ជីវភាពរបស់កសិករដែលកំពុងជួបបញ្ហាក្នុងអំឡុងពេលផ្ទុះជំងឺកូវីដនេះ ហើយលោកជំទាវក៏បានធ្វើការអំពាវនាវបន្ត សូមឲ្យប្រជាពលរដ្ឋខ្មែរជួយជ្រោមជ្រែងប្រើប្រាស់ផលិតផលផ្លែឈើខ្មែរយើងគ្រប់ៗគ្នាផង ។
ទាក់ទងទៅនឹងបញ្ហាទីផ្សារដោយភាគីថៃបិទច្រកទ្វារព្រំដែននេះដែរ ក្រសួងកសិកម្ម រុក្ខាប្រមាញ់ និងនេសាទ ក៏កំពុងដុតដៃដុតជើងយ៉ាងខ្លាំង ដើម្បីជួយកែប្រែបញ្ហាទាំងនេះ ដោយក្រសួងបានធ្វើការចរចា និងស្នើសុំទៅខាងភាគីថៃឱ្យបើកច្រកព្រំដែនជាច្រើនដងមកហើយ។ បន្ថែមពីនេះ ក្រសួងក៏បានអំពាវនាវដល់អ្នកនាំចេញផ្លែមៀនប៉ៃលិននៅខ្មែរយើង បង្វែរទីផ្សារពីប្រទេសថៃ ទៅកាន់ប្រទេសវៀតណាម ដើម្បីដោះស្រាយទីផ្សារមៀនក្នុងរដូវប្រមូលផលដែលជាប់គាំង ដោយសារការបិទព្រំដែនរវាងកម្ពុជា និងថៃ កំឡុងពេលផ្ទុះជំងឺកូវីដ-១៩ នេះ។
បន្ថែមពីនេះ កាលពីថ្ងៃទី១៧ ខែសីហា ឆ្នាំ២០២១ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន បានអនុញ្ញាតឱ្យឯកឧត្តម នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង នាយករងខុទ្ទកាល័យសម្តេចតេជោ ហ៊ុន សែន ដើម្បីប្រមូលទិញនូវកសិផលរបស់ប្រជាកសិករ គឺផ្លែមាន នៅតាមបណ្តាខេត្តជាប់ព្រំដែនកម្ពុជា-ថៃ ដែលកំពុងជួបបញ្ហាប្រឈមក្នុងការនាំចេញទៅលក់នៅក្រៅប្រទេស ដែលបណ្តាលមកពីការឆ្លងរីករាលដាលនៃជំងឺកូវីដ-១៩ នៅតាមព្រំដែនប្រទេសជិតខាងផងដែរ៕
