បន្ទាប់ពីបំពេញការងាររកស៊ីប្រកបមុខរបរអស់ពេញមួយថ្ងៃ យើងគ្រប់គ្នាត្រូវការសម្រាកនៅពេលរាត្រី ដើម្បីផ្តល់ឋាមពលនៃកម្លាំងសម្រាប់យើងធ្វើកិច្ចការថ្ងៃស្អែកបន្ត។ ការគេងឲ្យបានគ្រប់តាមវេជ្ជបញ្ជាគឺជារឿងត្រឹមត្រូវបំផុតសម្រាប់សុខភាពរបស់យើង។ រឿងមួយក្នុងចំណោមរឿងជាច្រើនដែលក្រុមគ្រូទេព្យតែងដាស់តឿននិងណែនាំរឿយៗនោះ គឺឪ្យយើងមុនចាប់ផ្តើមបំពេញការងាររកស៊ី ត្រូវហូបអាហារពេលព្រឹកឲ្យបានដើម្បីសុខភាព ខណៈតាមសេចក្តីរាយការណ៍ជាច្រើនឲ្យដឹងថា មានមហាសេដ្ឋី អ្នកជំនួញលើពិភពលោក និងនៅប្រទេសកម្ពុជា តែងអនុវត្តជាប់ជានិច្ច។
មហាសេដ្ឋីមានបំផុតនៅស្រុកខ្មែរ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ក៏បានណែនាំឲ្យយើងអនុវត្តនិងចាប់ផ្តើមថ្ងៃថ្មីរបស់យើង ជាមួយអាហារពេលព្រឹកដ៏ល្អសម្រាប់សុខភាព។
អ្នកឧកញ៉ាថ្លែងថា៖ “ខ្ញុំដឹងថា មនុស្សមួយចំនួនអាចរំលងអាហារពេលព្រឹក។ ប៉ុន្តែ សម្រាប់ខ្ញុំ អាហារពេលព្រឹកគឺជាអាហារដ៏សំខាន់បំផុតប្រចាំថ្ងៃ។ វាជួយដល់របបអាហារប្រចាំថ្ងៃ និងធ្វើឱ្យយើងមានសុខភាពល្អ ដោយផ្តល់ថាមពលដល់រាងកាយនិងបង្កើនប្រព័ន្ធភាពស៊ាំរបស់យើង។ មិនថាខ្ញុំរវល់បែបណាក៏ដោយ ក៏ខ្ញុំមិនមើលរំលងអាហារពេលព្រឹកទ្បើយ”។
អ្នកឧកញ៉ាបន្តថា គ្រួសាររបស់ខ្ញុំចូលចិត្តប្រភេទអាហារពេលព្រឹកខុសៗគ្នា។ ខ្ញុំផ្ទាល់ចូលចិត្ត និងតែងតែណែនាំម្ហូបខ្មែរ (បបរស និងត្រីងៀត) ដែលជាអាហារធ្វើឱ្យយើងមានសុខភាពល្អ សាមញ្ញ និងមានរសជាតិឆ្ងាញ់។ កូនៗរបស់ខ្ញុំចូលចិត្តពងមាន់ដែលចម្អិនដោយភរិយាខ្ញុំ។ ភរិយាខ្ញុំមានរូបមន្តពិសេសមួយសម្រាប់ចម្អិនអាហារនេះ ឬក៏អាចមកពីការចម្អិនអាហារទាំងនេះត្រូវបានធ្វើឡើងដោយក្តីស្រឡាញ់របស់ម្តាយ។
អ្នកឧកញ៉ាបញ្ជាក់ថា អាហារទាំងអស់នេះមិនត្រឹមតែបំពេញក្រពះរបស់យើងទេ ប៉ុន្តែវាមានគុណតម្លៃដែលនាំគ្រួសារយើងមកអង្គុយជាមួយគ្នានិងផ្តល់ថាមពលឱ្យគ្នាទៅវិញទៅមកពេញមួយថ្ងៃ។ ប្រសិនបើមានរឿងមួយដែលខ្ញុំអាចរំឭកអ្នកក្នុងថ្ងៃនេះ នោះគឺ “កុំរំលងអាហារពេលព្រឹករបស់អ្នក!”។
