មហាសេដ្ឋី​ផ្សេង​កើន​ទ្រព្យ​ហូរហែ តែ​មហាសេដ្ឋី​ចិន​​ស្ថាបនិក​ក្រុមហ៊ុន PinDuoDuo ខាត​ទ្រព្យ​ជាង​ពាក់កណ្ដាល​

អន្តរជាតិ

គិត​មក​ត្រឹម​ឆ្នាំ ២០២១ បើ​ទោះ​ជា​ស្ថានការណ៍​ COVID-19 នៅ​មិនទាន់​ធូរស្រាល​ច្រើន​ក្ដី​ តែ​ទំហំ​ទ្រព្យសម្បត្តិ​របស់​មហាសេដ្ឋី​ភាគច្រើន គឺ​មាន​ការ​កើនឡើង​ឥត​ឈប់ឈរ។ ជាក់ស្ដែង​ងារ​ជា​មហាសេដ្ឋី​មាន​បំផុត​លើ​លោក​ មាន​ការ​ប្រែប្រួល​តាម​សឹង​មិនទាន់​ដោយ​កាលពី​សប្ដាហ៍​មុន Elon Musk រ៉ាប់រង​តំណែង​នេះ​បាន​មួយ​ភ្លែត មុន​ពេល Jeff Bezos ដណ្ដើម​មក​វិញ។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

តែ​ទន្ទឹម​នឹង​នោះ ក៏​មាន​មហាសេដ្ឋី​ខ្លះ​មិនអាច​បង្កើន​ទ្រព្យសម្បត្តិ​បាន ហើយ​ថែមទាំង​ធ្លាក់ខ្លួន ខាតបង់​ប្រាក់​ច្រើន​សន្ធឹក​ផង​ដែរ តួយ៉ាង​ស្ថាបនិក​ក្រុមហ៊ុន PinDuoDuo លោក Coling Zheng Huang បាន​ខាតបង់​ទ្រព្យសម្បត្តិ​ដល់ទៅ​ពាក់​កណ្ដាល​ឯណោះ​សម្រាប់​រយៈពេល​ប៉ុន្មាន​ខែ​ចុងក្រោយ។

កាលពី​ខែកុម្ភៈ ទ្រព្យសម្បត្តិ​របស់ Huang មាន​រហូត​ដល់​ប្រមាណ ៧៥ ពាន់​ពាន់​ដុល្លារ​ នៅពេល​តម្លៃ​ភាគហ៊ុន​ Pinduoduo កើន​ដល់​ខ្ទង់ ២០០ ដុល្លារ/​ហ៊ុន ដែល​កើន​ទ្រព្យ​ប្រមាណ ១២ ពាន់​លាន​ដុល្លារ ពី​ខែមករា​។

តែ​បច្ចុប្បន្ន​ទ្រព្យសម្បត្តិ​របស់​ស្ថាបនិក​ក្រុមហ៊ុន​គូប្រជែង Alibaba មាន​ប្រមាណ​ត្រឹម ៣៣ ពាន់​លាន​ដុល្លារ​ប៉ុណ្ណោះ ដែល​ខាតបង់​រហូត​ដល់​ជាង ៣០ ពាន់​លាន​ដុល្លារ​បើ​គិត​តាំងពី​ដើម​ឆ្នាំ ២០២១ ឬ ៤២ ពាន់​លាន​ដុល្លារ គិត​ពី​ខែ​កុម្ភៈ​មក​ទល់​ពេលនេះ។

ដោយឡែក​ មូលហេតុ​ដែល​ធ្វើ​ឲ្យ Huang ខាតបង់​ប្រាក់​ច្រើនម្លឹងៗ​គឺ​ ដោយសារ​ការ​ប្រកាស​លាលែង​តំណែង​ជា​ CEO កាលពី​ខែ​មីនា ដែល​កាលនោះ​តម្លៃ​ភាគហ៊ុន​របស់​ក្រុមហ៊ុន​មាន​តម្លៃ ២០០ ដុល្លារ ហើយ​ធ្លាក់ចុះ​ ១៧% ភ្លាមៗ​ ក្រោយ​លោក​ប្រកាស​ដំណឹង​មួយ​នោះ។

ហេតុផល​មួយ​ទៀត​ដែល​បណ្ដាល​ឲ្យ​តម្លៃ​ភាគហ៊ុន PDD ធ្លាក់ចុះ​បែបនេះ​គឺ ដោយសារ​ប្រជាជន​ចិន​អាច​ដើរហើរ​វិញ​បាន ដូច្នេះ​ពួកគេ​លែង​សូវ​ចំណាយ​ទិញ​របស់របរ​គ្រប់យ៉ាង​តាម​អនឡាញ​ទៀត។

តែ​អ្វី​ដែល​ជា​មូលហេតុ​ក្ដៅ​គគុក​គឺ រាជរដ្ឋាភិបាល​ចិន​កំពុង​ព្យាយាម​ដាក់​ក្រុម​មហាសេដ្ឋី និង​ក្រុមហ៊ុន​បច្ចេកវិទ្យា​យក្សៗ​ជាច្រើន​ក្រោម​ឱវាទ​របស់​ពួកគេ ឬ​បិទ​តែ​ម្ដង​ក្រោម​ហេតុផល​ប្រឆាំង​ទំនុក​ចិត្ត។ ជាក់ស្ដែង​ កាលពី​ខែឧសភា អាជ្ញាធរ​ចិន​បាន​ផាក​ពិន័យ Alibaba ជិត ៣ ពាន់​លាន​ដុល្លារ ក្រោម​ហេតុផល​ល្មើសច្បាប់​ផ្ដាច់មុខ ដែល​បាន​ធ្វើ​ឲ្យ​វិនិយោគិន​ចិន​ចាប់ផ្ដើម​បារម្ភ​ថា ការ​ពិន័យ​នេះ​គ្រាន់តែ​ជា​ការគម្រាម​ស្រាលៗ​ប៉ុណ្ណោះ។

យ៉ាងណា ប្រហែល​ជា​យល់ឃើញ​ និង​ចង់​យកចិត្ត​អាជ្ញាធរ​ចិន ម្ចាស់​ក្រុមហ៊ុន PDD បាន​បរិច្ចាគ​ប្រមាណ ២,៤% នៃ​ភាគហ៊ុន​ធំ​របស់​ក្រុមហ៊ុន​ចូលរួម​ចំណែក​​សប្បុរសធម៌ និង ៧,៧% ផ្សេង​ទៀត សម្រាប់​ជួយ​ដល់​ការស្រាវជ្រាវ​ផ្នែក​វិទ្យាសាស្ត្រ​របស់​រដ្ឋា​ភិបាល៕

ប្រភព: celebritynetworth