បងប្អូន ២ នាក់​វ័យ​មិន​ដល់ ១៤​ ឆ្នាំ​ស្រួលបួល​ផង​ អាច​រក​ចំណូល​ខ្ទង់​ម៉ឺន​ដុល្លារ​ជា​រៀងរាល់​ខែ​

អន្តរជាតិ

បងប្អូន​ត្រកូល Thakur ដែល​បងប្រុស​ឈ្មោះ Ishaan មាន​អាយុ ១៤ ឆ្នាំ និង​ប្អូនស្រី​ឈ្មោះ Aanya មាន​អាយុ ៩ ឆ្នាំ អាច​មាន​សមត្ថភាព​ដ៏​អស្ចារ្យ​ពោល រក​ចំណូល​បាន​ខ្ទង់​ម៉ឺន​ដុល្លារ​ជា​រៀងរាល់​ខែ​ ពី​វិស័យ​ជីក​កាក់​ឌីជីថល ឬ Cryptocurrency Mining។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

ជា​រៀងរាល់​ខែ បងប្អូន​ទាំំងពីរ​នាក់​នេះ រក​បាន​ច្រើន​ជាង ៣ ម៉ឺន​ដុល្លារ ពី​ការ​ជីក​កាក់​ឌីជីថល ៣​ ប្រភេទ​ដែល​កំពុង​ពេញ​និយម​ខ្លាំង​គឺ Bitcoin, Ethereum និង Ravencoin។

ដើម្បី​អាច​រក​ចំណូល​ពី​វិស័យ​នេះ​បាន គឺ​ពិតជា​មិនមែន​ជា​រឿង​ងាយ​ស្រួល​ឡើយ ដោយ​ពួកគេ​ត្រូវ​សិក្សា​ស្វែងយល់​ពី​កម្មវិធី​កុំព្យូទ័រ​ដ៏​រញ៉េរញ៉ៃ និង​ត្រូវ​រៀបចំ​ប្រព័ន្ធ​ដ៏​សាំញ៉ាំ​ដើម្បី​អាច​ជីក​កាក់​ឌីជីថល​បាន។

យ៉ាងណា អាច​និយាយ​ថា វា​ជា​ចំណូលចិត្ត និង​មាន​ដុង​ពី​កំណើត​ផង Ishaan សិក្សា​ត្រឹម​រយៈពេល​ខ្លី​ប៉ុណ្ណោះ បន្ទាប់ពី​មើល​ការ​បង្រៀន​តាម YouTube និង​ស្រាវជ្រាវ​បន្ថែម​លើ​អ៊ីនធឺណិត ដោយ​ដំបូង​ឡើង គេ​ច្នៃ​កុំព្យូទ័រ​ម៉ាក Alienware ដែល​ជា​កុំព្យូទ័រ Gaming មាន​កម្លាំង​ម៉ាស៊ីន​ខ្លាំង​ទៅ​ជា​ឧបករណ៍​ជីក​កាក់​ដំបូង​ក្នុង​ខែមេសា ហើយ​ក្នុង​ថ្ងៃ​ដំបូង​គេ​រកបាន ៣ ដុល្លារ​ពី​វា។

ដោយ​មាន​ការ​គាំទ្រ ពី​ឪពុក​ម្ដាយ Ishaan បាន​សម្រេច​បង្កើត​ការ​ជីក​កាក់​នេះ​ជា​មុខរបរ​អាជីព​តែម្ដង ដោយ​គេ​និង​ប្អូនស្រី Aanya បាន​បង្កើត​ក្រុមហ៊ុន​ជីក​កាក់​ផ្ទាល់ខ្លួន​ឈ្មោះ Flifer Technologies ដែល​មាន​ការ​ជួយជ្រោមជ្រែង​ពី​ឪពុក Manish Raj នៅ​ថ្ងៃទី ៣០ ​ខែមេសា។

ចាប់តាំង​ពី​ពេលនោះ​មក ចំណូល​របស់​បងប្អូន​ទាំង ២ បន្ត​កើនឡើង​ឥត​ឈប់ឈរ​រហូត​ដល់​ចុងខែ​កក្កដា ពួកគេ​អាច​មាន​លទ្ធភាព​គ្រប់គ្រាន់​ក្នុង​ការ​ទិញ​សម្ភារៈ​យក​មក​ជីក​កាក់​បន្ថែម​ដែល​មាន​ដូចជា ក្រាហ្វិក​កាត Nvidia RTX 3080-Ti និង Antminers ជាដើម។

ជាទូទៅ Ishaan និង Aanya តែង​ប្រើប្រាស់​ក្រាហ្វិក​កាត Nvidia RTX 3090 សម្រាប់​ជីក​កាក់ ដែល​តម្លៃ​របស់​វា​គឺ​ចន្លោះ​ពី ២ ៥០០ ទៅ ៣ ០០០ ដុល្លារ​ក្នុង​មួយ​គ្រាប់ ខណៈ​បច្ចុប្បន្ន​ពួកគេ​ប្រើប្រាស់​ឧបករណ៍​ដែល​បំពាក់​ក្រាហ្វិក​កាត​បែបនេះ​ដល់ទៅ ៩៧ គ្រឿង​ឯណោះ។

ហេតុ​ដូច្នេះហើយ ការ​ខ្ចី​លុយ​ធនាគារ​យក​មក​រកស៊ី គឺ​ជៀស​មិន​ផុត​ទេ ដោយ​ឪពុក​របស់​គេ​ជា​អ្នក​រ៉ាប់រង​លើ​បន្ទុក​ទាំង​នេះ ខណៈ​ទំហំ​ប្រាក់កម្ចី​មិន​ត្រូវ​បាន​បង្ហើប​ឲ្យ​ដឹង​ឡើយ។

ដោយឡែក​ ថ្លៃ​អគ្គិសនី​នៅ​ក្រុមហ៊ុន និង​ផ្ទះ​ដែល​មាន​ទីតាំង​នៅ​ទីក្រុង Dallas រដ្ឋ Texas គឺ​ពួកគេ​ចំណាយ​អស់​ប្រមាណ​ជិត ៣ ០០០ ដុល្លារ/ខែ ស្របពេល​សម្រាប់​ខែ​កញ្ញា​នេះ Ishaan រំពឹង​ថា នឹង​បាន​ចំណូល​មក​វិញ​ខ្ទង់ ៣៦ ០០០ ដុល្លារ បើ​ផ្អែក​តាម​ការ Update ឧបករណ៍​ជីក​កាក់​កន្លង​មក។

តែ​យ៉ាងណា​ បើ​ទោះជា​កំពុង​មាន​ចំណូល​ខ្ពស់​មួយ​លើ​វិស័យ​ជីក​កាក់​ឌីជីថល​ក្ដី តែ​បងប្អូន​ទាំង ២ នាក់ បែរ​ជា​មាន​ក្ដី​ស្រមៃ​ខុស​ពី​អ្វី​ដែល​ពួកគេ​កំពុង​ធ្វើ ពោល​ទាំង ២ នាក់​បងប្អូន​ចង់​ក្លាយជា​គ្រូពេទ្យ ដោយ​បងប្រុស​ចង់​ចូលរៀន​នៅ​សាកលវិទ្យាល័យ University of Pennsylvania ខណៈ​បច្ចុប្បន្ន​គេ​ទើប​ចូល​រៀន​ថ្នាក់​វិទ្យាល័យ។

រីឯ​ប្អូនស្រី Aanya វិញ ចង់​ក្លាយជា​គ្រូពេទ្យ​ដូច​បងប្រុស​ដែរ តែ​ចង់​ទៅ​រៀន​នៅ​សាកលវិទ្យាល័យ New York University ខណៈ​បច្ចុប្បន្ន​កុមារី​រូប​នេះ​ទើប​នឹង​រៀន​ថ្នាក់​ទី ៤ នៅ​បឋមសិក្សា​ប៉ុណ្ណោះ៕

ប្រភព: cnbc