កាលពីពេលថ្មីៗនេះ នៅប្រទេសជប៉ុនមានការភ្ញាក់ផ្អើលជាខ្លាំង ក្រោយព្រះនាង Mako ដែលជាបុត្រីរបស់ព្រះអង្គម្ចាស់ Akishino និងជាក្មួយស្រីរបស់អធិរាជ Naruhito បានប្រកាសថា ទ្រង់នឹងរៀបអភិសេកជាមួយសង្សារសំណព្វចិត្តដែលជាប្រជារាស្ត្រសាមញ្ញឈ្មោះ Kei Komuro។
អ្នកទាំង ២ បានប្រកាសគម្រោងអាពាហ៍ពិពាហ៍ដោយនឹងមិនរៀបចំតាមបែបប្រពៃណីច្រើនឡើយ ហើយក៏បានបដិសេធមិនព្រមទទួលចំណងដៃដែលជាទូទៅ គ្រួសាររាជវង្សត្រូវផ្ដល់ទឹកប្រាក់មួយចំនួនសម្រាប់ សមាជិកណាម្នាក់ដែលសម្រេចចាកចេញពីគ្រួសាររាជវង្ស។
នេះមានន័យថា ព្រះនាង Mako នឹងបាត់បង់គោរមងារ បន្ទាប់ពីបញ្ចប់ការរៀបអាពាហ៍ពិពាហ៍ជាផ្លូវការជាមួយសង្សារជារាស្ត្រសាមញ្ញ។ ដោយឡែកទំហំទឹកប្រាក់ដែលខ្សែរាជវង្សគ្រោងផ្ដល់ឲ្យព្រះនាង Mako នោះ គឺមិនដឹងពីចំនួនជាក់លាក់ឡើយ គ្រាន់តែប្រភពខ្លះអះអាងថា ប្រមាណ ១,២ លានដុល្លារ ឬអាចច្រើនជាងនេះ។
ថ្វីត្បិតមានមតិរិះគន់ជាច្រើនជុំវិញរឿងរ៉ាវដ៏ក្ដៅគគុកមួយនេះ តែព្រះបិតារបស់ព្រះនាង គឺគាំទ្រពេញទំហឹងចំពោះការសម្រេចចិត្តរបស់ទ្រង់ តែព្រះអង្គឲ្យដំបូន្មានថា ព្រះនាង Mako គួរតែព្យាយាមយកឈ្នះចិត្តមតិសាធារណៈផង។
យ៉ាងណា ព្រះនាង Mako បានសម្រេចចិត្តរួចស្រេចហើយ គឺនឹងរៀបការ បើទោះជាមជ្ឈដ្ឋានជុំវិញមិនពេញចិត្តក៏ដោយ ហើយគម្រោងបន្ទាប់គឺ ទ្រង់និងសង្សារនឹងផ្លាស់ទៅរស់នៅសហរដ្ឋអាមេរិក ក្រោយបញ្ចប់ការរៀបអាពាហ៍ពិពាហ៍ ខណៈកាលបរិច្ឆេទគឺមិនត្រូវបានប្រកាសនៅឡើយ៕
ប្រភព: scmp
