លោក Larry Page និង Sergey Brin គឺជាស្ថាបនិកក្រុមហ៊ុនលំដាប់ពិភពលោក Google បានបំបែកកំណត់ត្រាដ៏អស្ចារ្យមួយ ត្រឹមរយៈពេល ៨ ខែ អាចរកចំណូលបានរហូតដល់ជាង ៩៣ ពាន់លានដុល្លារឯណោះ។
គិតត្រឹមចុងខែសីហា ទ្រព្យសម្បត្តិរបស់ Larry គឺមាន ១២៩ ពាន់លានដុល្លារ ខណៈ Sergey មាន ១២៤ ពាន់លានដុល្លារ ដោយអ្នកទាំង ២ កើនចំណូលប្រមាណ ៤៧,៣ ពាន់លានដុល្លារ និង ៤៦,៣ ពាន់លានដុល្លារ គិតចាប់ពីដើមឆ្នាំ ២០២១ មកដល់ចុងខែសីហា។ សរុបទៅចំណូលស្ថាបនិក Google ក្នុងរយៈពេល ៨ ខែគឺមានរហូតដល់ ៩៣,៦ ពាន់លានដុល្លារឯណោះ។
ដោយឡែកមូលហេតុដែលនាំឲ្យតួលេខទ្រព្យសម្បត្តិរបស់មហាសេដ្ឋីទាំង ២ រូបខាងលើកើនឡើងយ៉ាងគំហុកបែបនេះ គឺដោយសារតម្លៃភាគហ៊ុនរបស់ Google កើនឡើងជាលំដាប់ និងកាលពីពេលថ្មីៗនេះ កើនជាងខែសីហាដល់ទៅ ៧% ជាមួយតម្លៃប្រមាណ ២ ៩០៩ ដុល្លារ/ហ៊ុន ដែលជាតម្លៃខ្ពស់បំផុតមិនធ្លាប់មានពីមុន។
រហូតដល់ចុងខែសីហា ក្រុមហ៊ុនបច្ចេកវិទ្យាមួយនេះមានមូលធនទីផ្សារសរុបប្រមាណ ១.៩៤ ទ្រីលានដុល្លារ ហើយបើគិតចាប់ពីឆ្នាំ ២០០៩ មក ការកើនឡើងនៃតម្លៃភាគហ៊ុនពេលនេះ គឺជាការកើនឡើងខ្ពស់បំផុត និងយូរបំផុតប្រចាំប្រវត្តិសាស្ត្រ។
ជាមួយជោគជ័យដ៏ធំសម្បើមនេះផងដែរ បានធ្វើឲ្យតម្លៃភាគហ៊ុន Google កើនដល់ទៅ ៧៨% បើធៀបឆ្នាំមុន ខណៈក្នុងចំណោមក្រុមហ៊ុនបច្ចេកវិទ្យាទូទាំងពិភពលោក Google ចាញ់ក្រុមហ៊ុនតែ ២ ប៉ុណ្ណោះ បើទោះជាបច្ចុប្បន្នមូលធនទីផ្សាររបស់ពួកគេមានដល់ជិត ២ ទ្រីលានក្ដី រីឯក្រុមហ៊ុនយក្ស ២ ដែលមានតម្លៃជាង Google គឺ Apple Inc. និង Microsoft Corp.៕
ប្រភព: nairametrics
