តាមការចុះផ្សាយពីសារព័ត៌មាន Gavroche Thaïlande ប្រធានាធិបតីបារាំងបានតែងតាំងស្រ្តីដើមកំណើតខ្មែរម្នាក់ ជាឯកអគ្គរដ្ឋទូតបារាំងប្រចាំប្រទេសឡាវ។ តាមសារព័ត៌មានដដែលបានចុះផ្សាយថា លោកស្រី ឈួរ ស៊ីវឡេង (Siv Leng Chhuor) អាយុ៥៤ឆ្នាំ ដែលមានកំណើតនៅរាជធានីភ្នំពេញ ត្រូវបានតែងតាំងជាឯកអគ្គរដ្ឋទូតបារាំងប្រចាំប្រទេសឡាវ បន្តពីលោកស្រី Florence Jeanblanc-Risler ដែលបានបញ្ចប់អណត្តិកាលពីថ្ងៃទី២៦ ខែកញ្ញា ឆ្នាំ២០២១។
លោកស្រី ឈួរ ស៊ីវឡេង ទទួលបានការតែងតាំ ពីលោកប្រធានាធិបតី Emmanuel Macron និងលោកនាយករដ្ឋមន្ត្រី Jean Castex។
យោងតាមការផ្សាយរបស់ Gavroche Thaïlande ស្ត្រីដែលមានដើមកំណើតនៅរាជធានីភ្នំពេញរូបនេះ មានពិសោធន៍ជាច្រើនលើការងារការទូតនៅក្នុងនយោបាយបារាំង។ លោកស្រី ស៊ីវឡេង ចូលបម្រើការនៅក្រសួងការបរទេសបារាំង ចាប់តាំងពីឆ្នាំ១៩៩៥មក។
មុនពេលទទួលបានការតែងតាំងជាឯកអគ្គរដ្ឋទូតបារាំងប្រចាំប្រទេសឡាវ ចាប់តាំងពីខែមេសា ឆ្នាំ២០១៧ មក លោកស្រី ស៊ីវឡេង ជាអគ្គកុងស៊ុលបារាំងប្រចាំខេត្ត Canton ប្រទេសចិន៕
