ថ្មីៗនេះ អគ្គនាយកពន្ធដារបានពិចារណាកាត់បន្ថយពន្ធលើប្រាក់ចំណូលផ្ទាល់ខ្លួន សម្រាប់អ្នកជំនាញបរទេសដល់ទៅ ១៧% ដែលជាផ្នែកមួយនៃវិធានការណ៍ទាក់ទាញអ្នកជំនាញដែលមានជំនាញខ្ពស់មកធ្វើការនៅប្រទេសថៃ។ នេះបើតាមអគ្គនាយក Ekniti Nitithanprapas ។
ជាទូទៅ អត្រាពន្ធប្រាក់ចំណូលផ្ទាល់ខ្លួនដែលជនបរទេសត្រូវបង់ជូនរដ្ឋាភិបាលគឺមានចំនួនខ្ពស់គួរសម ពោលគឺស៊ីសងទៅលើប្រាក់ប្រចាំឆ្នាំដែលជននោះអាចរកបាន។ ឧបមាថា បុគ្គលណាអាចមានចំណូលចាប់ពី ១៥០ ០០១ បាតដល់ ៣០០ ០០០ បាត នឹងតម្រូវឲ្យបង់ពន្ធ ៥% ខណៈបើរកបានច្រើនជាង ៥ លានបាត នឹងអាចបង់ដល់ទៅ ៣៥% ឯណោះ។
លោក Ekniti បានបន្ថែមថា ករណីដែលបានតម្រូវឲ្យជនបរទេសបង់ពន្ធទាបជាងមុន គឺដាច់ខាតពួកគេត្រូវតែធ្វើការទាក់ទងនឹងវិស័យដែលកំពុងខ្វះខាតនៅប្រទេសថៃ ហើយអាចធ្វើការនៅគ្រប់ទីកន្លែងពេញផ្ទៃប្រទេស។
ប្រភពដដែលបន្ថែមថា បច្ចុប្បន្នមន្ត្រីពាក់ព័ន្ធកំពុងសិក្សាពីរយៈពេលជាក់លាក់មួយសម្រាប់អនុម័តច្បាប់ខាងលើ ព្រោះចង់ឲ្យជនបរទេសដែលមានជំនាញ និងសក្ដានុពលអាចស្នាក់នៅក្នុងប្រទេសបានយូរ។
យ៉ាងណា លោក Ekniti បានអះអាងថា ការកាត់បន្ថយពន្ធចំណូលប្រចាំឆ្នាំ មិនមែនជាវិធីសាស្ត្រចំបង ដើម្បីអូសទាញជនបរទេសមកធ្វើការនៅក្នុងប្រទេសឡើយ ពោលនៅមានកត្តាសំខាន់ៗជាច្រើនដូចជា សុវត្ថិភាពផ្ទៃប្រទេស វិស័យអប់រំមានគុណភាព និងវិស័យសុខាភិបាលរឹងមាំជាដើម សុទ្ធតែជាកត្តាសំខាន់ដែលអាចអូសទាញអ្នកជំនាញបរទេសមកធ្វើការក្នុងស្រុកបាន៕
ប្រភព: bangkokpost
