ប្រទេសអាល្លឺម៉ង់ រំពឹងថានឹងអាចរកចំណូលចូលរដ្ឋបានបន្ថែមចន្លោះពី ៥ ទៅ ៦ ពាន់លានដុល្លារអឺរ៉ូ ឬចន្លោះពី ៥,៨ ទៅ ៦,៩ ពាន់លានដុល្លារ ពីការបង់ពន្ធនៃក្រុមហ៊ុនធំៗ ដោយសារច្បាប់ថ្មី គឺតម្រូវឲ្យក្រុមហ៊ុនធំៗទូទាំងសកលលោកបង់ពន្ធជូនប្រទេសដែលកំពុងធ្វើអាជីវកម្មប្រមាណ ១៥%។
ច្បាប់ថ្មីនេះផងដែរ គឺអនុម័តសម្រាប់ប្រទេសប្រមាណ ១៣៦ ប្រទេស ដែលកំណត់ជាស្រេចរាល់ក្រុមហ៊ុនធំៗដែលកំពុងធ្វើអាជីវកម្មនៅក្នុងប្រទេសគឺត្រូវបង់ពន្ធទាបបំផុត ១៥% គិតចាប់ពីឆ្នាំ ២០២៣ ដែលអាចផ្ដល់ផលចំណេញដល់ប្រទេសដែលមានអត្រាពន្ធទាប ទៅកាន់កម្រិតមធ្យមនៅរយៈពេលវែង ហើយផលចំណេញនេះផងដែរក៏ បានជះឥទ្ធិពលល្អដល់អាជ្ញាធរពន្ធអាល្លឺម៉ង់ទៀតផង។
បើតាមការស្រាវជ្រាវពីវិទ្យាស្ថាន IFO ដែលមានចក្ខុវិស័យជួយសម្រួលប្រព័ន្ធសេដ្ឋកិច្ចប្រទេសអាល្លឺម៉ង់ និងសហព័ន្ធអឺរ៉ុប បានឲ្យដឹងថា ការសម្រេចចិត្តអនុម័តច្បាប់នេះ គឺដើម្បីដាស់តឿនដល់អ្នកនយោបាយ និងអ្នកជំនួញធំៗ។
ដោយឡែកបើតាមទិន្នន័យពីក្រសួងពន្ធដារអាល្លឺម៉ង់ បានសន្និដ្ឋានថា ចំណូលពន្ធអាល្លឺម៉ង់ឆ្នាំនេះ នឹងអាចកើនឡើងដល់ ៧៧៣ ពាន់លានអឺរ៉ូ។
ថ្វីបើអត្រាពន្ធ ១៥% វាហាក់ដូចជាច្រើនក៏ពិតមែន តែបើប្រៀបធៀបទៅនឹងប្រទេសឧស្សាហកម្មផ្សេងៗវិញ គឺនៅទាបជាង ដោយសារពន្ធនៅប្រទេសឧស្សាហកម្មគឺជាមធ្យម ២៣,៥%៕
ប្រភព: Kelo
