ការប្រើប្រាស់ហ្គាសនៅប្រទេសរុស្ស៊ីគឺកំពុងមានការកើនឡើងខ្ពស់ អាចចូលដល់កំណត់ត្រាផង តែប្រទេសមួយនេះនៅបន្តត្រៀមខ្លួនផ្គត់ផ្គង់ហ្គាសទៅប៉ែកអឺរ៉ុប បន្ទាប់ពីទទួលបានការបញ្ជាទិញ។ នេះបើតាមការលើកឡើងពីឧបនាយករដ្ឋមន្ត្រី Alexander Novak បាននិយាយកាលពីថ្ងៃសៅរ៍។
តម្លៃហ្គាសនៅអឺរ៉ុបមានការកើនឡើងខ្លាំងរហូតដល់ ៨០០% ឆ្នាំនេះ ស្របពេលតម្រូវការក៏មានសន្ទុះមិនធម្មតា បន្ទាប់ពីមានការងើបឡើងវិញខ្លះៗនៃកំណើនសេដ្ឋកិច្ច ក្រោយរងការប៉ះពាល់ពីវិបត្តិកូវីដ ១៩។
ជាមួយគ្នានោះ រុស្ស៊ីដែលជាកូនសោសំខាន់នៃការផ្គត់ផ្គង់ហ្គាសនៅតំបន់អឺរ៉ុបបានអះអាងថា អាចផ្គត់ផ្គង់ហ្គាសដល់បណ្ដាប្រទេសផ្សេងៗបាន ខណៈការផ្គត់ផ្គង់ទាំងនេះនៅមិនទាន់លេចចេញជារូបរាងនៅឡើយ។
ការផលិត និងផ្គត់ផ្គង់ហ្គាសទៅប៉ែកអឺរ៉ុបរបស់រុស្ស៊ីគឺកំពុងកៀកខ្លាំងមែនទែន ដល់ចំណុចបំបែកកំណត់ត្រា តែមុននឹងអាចនាំយកហ្គាសទៅលក់លើទីផ្សារអឺរ៉ុបបាន ចាំបាច់ត្រូវបំពេញកន្លែងផ្ទុកឧស្ម័នរបស់ពួកគេជាមុនសិន ពោលអាចនឹងបញ្ចប់នៅចុងខែតុលានេះ។
លោក Novak មិនបានបញ្ជាក់ទេថា កន្លែងផ្ទុកឧស្ម័នរបស់ប្រទេសរុស្ស៊ីមានទំហំធំប៉ុណ្ណា តែគេសន្និដ្ឋានថា បរិក្ខារក្រោមដីនៅតំបន់អឺរ៉ុបគឺកំពុងខ្វះខាតឧស្ម័នប្រហែល ២៥ ពាន់លានម៉ែត្រគីប។ លោកបានអះអាងថា បើទោះជាតម្រូវការក្នុងស្រុកមានការកើនឡើងខ្ពស់ក្ដី ក៏វានឹងមិនអាចបញ្ឈប់រុស្ស៊ីក្នុងការបន្តផ្គត់ផ្គង់ហ្គាសទៅកាន់តំបន់អឺរ៉ុបបានដែរ៕
ប្រភព: Money
