ទោះស្ថិតក្នុងស្ថានភាពនៃការរាតត្បាតនៃជំងឺកូវីដ ១៩ ក្តី ក៏មន្ទីរពេទ្យគន្ធបុប្ផា នៅតែបន្តដំណើរការពិនិត្យព្យាបាល អ្នកជំងឺទូទៅជាធម្មតា ប្រកបដោយគុណភាព និងប្រសិទ្ធភាពខ្ពស់។ ទន្ទឹមគ្នានោះ មធ្យោបាយនៃការទទួលជំនួយថវិកាសប្បុរសធម៌នានា តាមប្រព័ន្ធគណនីធនាគារអនឡាញ ដែលជាដៃគូសហការ ក៏ត្រូវបានប្រកាសជាសាធារណៈ ដើម្បីមានភាពងាយស្រួល។
ខាងក្រោមនេះ ជាលេខគណនីធនាគារដៃគូ ក្នុងស្រុកទាំង ៨ ដែលបានសហការទទួលថវិកាពីសប្បុរជន ដោយមិនគិតថ្លៃសេវា ដើម្បីជួយដល់មូលនិធិគន្ធបុប្ផាកម្ពុជា រួមមានដូចជា៖ ធនាគារ Canadia ធនាគារ ACLEDA ធនាគារ ABA ធនាគារ Chip Mong ធនាគារ Wing ធនាគារ Sathapana ធនាគារ J Trust Royal និងភ្នាក់ងារ True Money ។
បន្ថែមពីនេះ សប្បុរសជន ក៏អាចផ្ដល់អំណោយថវិកា ដល់កុមារកម្ពុជា ដែលកំពុងសម្រាកព្យាបាលជំងឺតាមសាខាមន្ទីរពេទ្យគន្ធបុប្ផាទាំង ៥ ទីតាំង នៅទូទាំងប្រទេសកម្ពុជា ដោយផ្ទាល់នៅលេខាធិការដ្ឋានមូលនិធិគន្ធបុប្ផាកម្ពុជា ដែលមានទីតាំងនៅទីស្តីការក្រសួងសេដ្ឋកិច្ច និងហិរញ្ញវត្ថុ ឬតាមរយៈលេខទូរស័ព្ទ ០៦១ ៧០ ១១១១ បានផងដែរ។
មូលនិធិគន្ធបុប្ផាកម្ពុជា គឺជាមូលនិធិផ្លូវការ ដែលបង្កើតឡើង ដោយរាជរដ្ឋាភិបាល ដើម្បីបម្រើគោលដៅតែមួយគត់ គឺធានាថា មន្ទីរពេទ្យគន្ធបុប្ផាទាំង ៥ ទីតាំងនឹងបន្តបេសកកម្មចម្បងក្នុងការពិនិត្យព្យាបាល និងសង្គ្រោះកុមារប្រកបដោយគុណភាព ឥតគិតថ្លៃ និងមិនមានការរើសអើង។ ថវិកានេះនឹងត្រូវចាត់ចែងប្រើប្រាស់ដោយគណៈគ្រប់គ្រងរបស់មន្ទីរពេទ្យនៅពេលមានតម្រូវការ។
តាមរបាយការណ៍មន្ទីរពេទ្យគន្ធបុប្ផាបានបង្ហាញថា ក្នុងខែកក្កដា ឆ្នាំ ២០២១ កុមារឈឺចំនួន ១៨ ៨១៨ នាក់ ត្រូវបានពិនិត្យព្យាបាលនៅផ្នែកពិគ្រោះជំងឺក្រៅ។ កុមារមានជំងឺធ្ងន់ៗចំនួន ២ ៧៥១ នាក់ ត្រូវបានដាក់ឱ្យសម្រាកព្យាបាលនៅក្នុងមន្ទីរពេទ្យ។ ដោយឡែក យោងតាមរបាយការណ៍ មូលនិធិគន្ធបុប្ផាកម្ពុជា បានបញ្ជាក់ដែរថា សម្រាប់ឆមាសទី១ ឆ្នាំ ២០២១ មូលនិធិគន្ធបុប្ផាបានទទួលថវិកាបរិច្ចាគពីសប្បុរសជន ជាង ៤ លាន ៧ សែនដុល្លារអាមេរិក៕
