កាលពីពេលកន្លងទៅ មានចចាមអារ៉ាមថា គេប្រទះឃើញមហាសេដ្ឋី Jack Ma កំពុងធ្វើដំណើរកម្សាន្តនៅកោះ Mallorca ប្រទេសអេស្ប៉ាញ បន្ទាប់ពីស្ងាត់ដំណឹងរបស់លោកអស់រយៈពេលជាយូរ ក្រោយបុរសរូបនេះចេញមុខរិះគន់ប្រព័ន្ធគ្រប់គ្រងរបស់រដ្ឋាភិបាលចិនជាសាធារណៈ។
យ៉ាងណា បើតាមប្រភពជិតស្និទ្ធមួយបានទម្លាយឲ្យដឹងថា ដំណើរកម្សាន្តសារនេះគឺមិនមែនគ្រាន់តែចង់រំសាយអារម្មណ៍ឡើយ ពោលអតីត CEO របស់ Alibaba មានគម្រោងចង់ស្វែងយល់បន្ថែមពីវិស័យកសិកម្មបែបទំនើបនៅទូទាំងតំបន់អឺរ៉ុប។
ប្រភពដដែលបន្ថែមថា Jack Ma នឹងបន្តទស្សនកិច្ចទៅកាន់ក្រុមហ៊ុនធំៗជាច្រើន និងវិទ្យាស្ថានស្រាវជ្រាវទាក់ទងនឹងផ្នែកកសិឧស្សាហកម្ម និងផ្នែកបន្តពូជរុក្ខជាតិផ្សេងៗ ដោយលោកជឿថា យកចំណេះដឹងពីបទពិសោធន៍សារនេះ មកច្របាច់បញ្ចូលគ្នាជាមួយបច្ចេកវិទ្យារបស់ Alibaba នឹងអាចជួយដល់វិស័យកសិកម្មបែបទំនើបនៅប្រទេសចិនជាមិនខាន។
បញ្ជាក់ដែរថា កាលពីថ្ងៃទី ០២ កញ្ញាកន្លងទៅ Alibaba បានប្រកាសវិនិយោគទឹកប្រាក់ប្រមាណ ១០០ ពាន់លានយ័ន ឬ ១៥,៤ ពាន់លានដុល្លារដល់ឆ្នាំ ២០២៥ សម្រាប់គម្រោងសប្បុរសធម៌របស់រដ្ឋាភិបាលដែលដឹកនាំដោយផ្ទាល់ដោយប្រធានាធិបតី Xi Jinping៕
ប្រភព: Kelo
