រាជរដ្ឋាភិបាលកម្ពុជា សម្រេចដាក់ឱ្យដំណើរការជាផ្លូវការនូវ“ គេហទំព័រ KhmerSME ដែលជាថ្នាលព័ត៌មានពេញលេញ និងជាកន្លែងផ្តួចផ្តើមគំនិតធុរកិច្ចដ៏មានប្រសិទ្ធភាព សម្រាប់សហគ្រាសធុនមីក្រូ តូច និងមធ្យម ដើម្បីកសាង និងពង្រឹងសមត្ថភាពខ្លួន រួមទាំងពង្រីកវិមាត្រធុរកិច្ចពីធុនមីក្រូទៅធុនតូច តាមលំដាប់លំដោយ នៅក្នុងកិច្ចប្រតិបត្តិការផលិតកម្ម អាជីវកម្ម និងសេវាកម្ម និងសំដៅជំរុញការប្រកួតប្រជែងប្រកបដោយប្រសិទ្ធភាព។
“គេហទំព័រ KhmerSME” គឺជា ថ្នាលព័ត៌មានឌីជីថល (Digital Information Platform) ដែលផ្តល់ឱកាសឲ្យសហគ្រាសធុនមីក្រូ តូច និងមធ្យមទាំងអស់ទទួលបាននូវព័ត៌មាននៅនឹងកន្លែង ដូចជា ផ្នែកច្បាប់ បទប្បញ្ញត្តិ លិខិតបទដ្ឋានគតិយុត្តិ ការបណ្តុះបណ្តាល បច្ចេកទេស ការផ្ទេរ បច្ចេកវិទ្យា វិទ្យាសាស្ត្រ នវានុវត្តន៍ ហិរញ្ញប្បទាន ទីផ្សារ ការចាប់ផ្តើមអាជីវកម្មថ្មី ការលើកទឹកចិត្ត សម្រាប់ការធ្វើធុរកិច្ចឲ្យកាន់តែមានប្រសិទ្ធភាពខ្ពស់ ការប្រកួតប្រជែងមានលក្ខណៈជាយុទ្ធសាស្ត្រ និងប្រកបដោយបរិយាប័ន្ន។
ការប្រកាសដាក់ឲ្យប្រើគេហទំព័រ KhmerSME នេះក្រោមជំនួយឧបត្ថម្ភរបស់រដ្ឋាភិបាលអាល្លឺម៉ង់ ទីភ្នាក់ងារសហប្រតិបត្តិការអន្តរជាតិអាល្លឺម៉ង់ GIZ សហការជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។
បើតាមលោក ចម ប្រសិទ្ធ រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឲ្យដឹងថា៖ រាជរដ្ឋាភិបាល បានលើកកម្ពស់សហគ្រាសក្នុងស្រុក គឺសហគ្រាសធុនតូចនិងមធ្យម ជាវិស័យអាទិភាព ដែលមានលទ្ធភាពជួយស្តារស្ថានភាពសេដ្ឋកិច្ចជាតិឲ្យមានភាពប្រសើរឡើងវិញ ដោយបានកំណត់នូវមុខផលិតផលមួយចំនួនជាទំនិញយុទ្ធសាស្ត្ររបស់រាជរដ្ឋាភិបាល សម្រាប់ផ្គត់ផ្គង់សេចក្តីត្រូវរបស់ប្រជាពលរដ្ឋប្រចាំថ្ងៃ។
លោកបន្តថា តាមរយៈនេះ ផលិតផលទាំងអស់ ទាមទារចាំបាច់ត្រូវមានគុណភាព និងសុវត្ថិភាពដល់អ្នកប្រើប្រាស់ ដូចនេះ “គេហទំព័រ Khmer SME” ដែលជា ថ្នាលព័ត៌មានឌីជីថល ពិតជាមានសារៈសំខាន់ណាស់សម្រាប់សហគ្រាសធុនមីក្រូ តូច និងមធ្យម ក្នុងការទាញយកព័ត៌មានចាំបាច់និងសំខាន់ៗ តាមតម្រូវការ ដើម្បីអភិវឌ្ឍន៍ផលិតផលឲ្យគុណភាព និងសុវត្ថិភាព ស្របតាមស្តង់ដារកម្ពុជា។
បន្ថែមលើនេះ ការដាក់ឱ្យដំណើរការនូវ “ គេហទំព័រ Khmer SME” គឺមានលក្ខណៈស្រប និងការគាំទ្រដល់ផែនការយុទ្ធសាស្ត្រ និងគោលនយោបាយនានារបស់រាជរដ្ឋាភិបាល ដូចជា៖ យុទ្ធសាស្ត្រចតុកោណ-ដំណាក់កាលទី៤ ផែនការយុទ្ធសាស្ត្រអភិវឌ្ឍន៍ជាតិឆ្នាំ២០១៩-២០២៣ គោលនយោបាយអភិវឌ្ឍន៍ឧស្សាហកម្មឆ្នាំ២០១៥-២០២៥ សេចក្តីព្រាងគោលនយោបាយអភិវឌ្ឍន៍សហគ្រាសធុនតូច និងមធ្យមឆ្នាំ២០២២-២០២៦ ផែនទីបង្ហាញផ្លូវវិទ្យាសាស្ត្រ បច្ចេកវិទ្យា និង នវានុវត្តន៍កម្ពុជាឆ្នាំ២០៣០ និងផែនទីបង្ហាញផ្លូវ សេដ្ឋកិច្ច ឌីជីថល ពាណិជ្ជកម្ម អេឡិចត្រូនិក ជាដើម ដែលមានគោលដៅ បន្តនិងពង្រឹងការអភិវឌ្ឍធនធានមនុស្ស ការធ្វើធុរកិច្ចការលើកកម្ពស់ ផលិតភាព គំនិតច្នៃប្រឌិត ស្របតាមនិន្នាការនៃការអភិវឌ្ឍសេដ្ឋកិច្ច សង្គម និងបច្ចេកវិទ្យាសកល និងក្នុងបរិបទបដិវត្តន៍ឧស្សាហកម្មជំនាន់ទី៤ ដើម្បីចូលរួមចំណែកជំរុញកំណើនសេដ្ឋកិច្ចប្រកប ដោយចីរភាព និងបរិយាប័ន្ន៕
