ខេត្តកំពតមានកំពង់ផែចំនួន៤ ដែលកំពុងដំណើរការសាងសង់។ កំពង់ផែទាំង ៤ នោះគឺទី១.កំពង់ផែឧកញ៉ា វិញ ហួរ ដែលមានជម្រៅទឹករហូតដល់ ១៤ម៉ែត្រ សម្រាប់ដឹកជញ្ជូនទំនិញតាមកប៉ាល់ធំៗ។ ទី២.កំពង់ផែរបស់ឧកញ៉ា ទ្រី ភាព សម្រាប់ដឹកជញ្ជូនប្រេងចូល។ ទី៣.កំពង់ផែរបស់លោកជំទាវ កែវ ម៉ាលី សម្រាប់ដឹកជញ្ជូននាំចេញស្រូវ និងផលិតផលផ្សេងៗ ចេញចូលប្រទេសថៃ និងទី៤.គម្រោងកំពង់ផែទេសចរណ៍អន្តរជាតិខេត្តកំពត សម្រាប់ភ្ញៀវទេសចរបរទេសដែលធ្វើដំណើរតាមកប៉ាល់ ពិសេសទេសចរមកពីប្រទេសវៀតណាម និងថៃអាចចូលចតបាន។
កំពង់ផែទេសចរណ៍អន្តរជាតិខេត្តកំពត ដែលក្រោមជំនួយរបស់ធនាគារអភិវឌ្ឍអាស៊ី ADB គ្រោងបញ្ចប់ការសាងសង់នៅក្នុងឆ្នាំ២០២១។ សាងសង់នៅលើផ្ទៃដីទំហំ៤ហិកតា គឺជាកំពង់ផែទេសចរណ៍អន្តរជាតិ ដែលអាចផ្ទុកអ្នកដំណើរប្រមាណ ១ លាននាក់ ដែលបម្រើវិស័យទេសចរណ៍ខេត្តជាប់សមុទ្រមួយនេះ ។ កំពង់ផែនេះ បានចាប់ផ្តើមបើកការដ្ឋានសាងសង់កាលពីថ្ងៃទី ៨ ខែសីហា ឆ្នាំ ២០១៨ រហូតមកបច្ចុប្បន្នការងារការដ្ឋានទាំងមូលសម្រេចបានប្រមាណ ៨៤% និងការងារអគារអ្នកដំណើរសម្រេចបានប្រមាណ ៧៣% ដោយគ្រោងនឹងបញ្ចប់នៅដំណាច់ឆ្នាំ ២០២១ ខាងមុខនេះ ។
ដោយឡែកកំពង់ផែរបស់ឧកញ៉ា ទ្រី ភាព ក៏បានសម្រេចបានលទ្ធផលមួយចំនួន។ នេះបើលោកស៊យ ស៊ីណុលប្រធានមន្ទីរទេសចរណ៍ខេត្តកំពតបានលើកឡើងក្នុងវេទិការវឌ្ឍនភាពខេត្តក្រុងកន្លងទៅនេះ។
គម្រោងកំពង់ផែទឹកជ្រៅនេះ គឺជាការបណ្ដាក់ទុនរួមរវាងក្រុមហ៊ុនចិន Guangxi Beibu Gulf International Port Group Co., Ltd. និងក្រុមហ៊ុន ទ្រី ភាព គ្រុប របស់អ្នកឧកញ៉ា ទ្រី ភាព ដែលមានសមត្ថភាពឲ្យនាវាសមុទ្រធុនធំផ្ទុកទំនិញ ចាប់ពី ១ម៉ឺនតោន ដល់ ៣ម៉ឺនតោន អាចចូលចត ផ្ទេរ និងផ្ទុកទំនិញបាន។
ចំណែកកំពង់ផែរបស់អ្នកឧកញ៉ាវិញ ហួរ បានចុះកិច្ចសន្យាសហការសាងសង់ជាមួយក្រុមហ៊ុន CRCC harbor & Channel Engineering ដែលបានបើកការដ្ឋានបូមស្តារឃ្លងនាវាចេញ-ចូល ជំរៅ ១៤ម ស្ថិតក្នុងឃុំបឹងទូក និងឃុំកោះតូច ស្រុកទឹកឈូ ខេត្តកំពត។
ដោយឡែកកំពងផែកលោកជំទាវ កែវ ម៉ាលី កំពុងបន្តដំណើរការទៅមុខ បើទោះជាលោកជំទាវបានទទួលមរណភាពកាលពីខែតុលា ឆ្នាំ២០២០។ គម្រោងអភិវឌ្ឍកំពង់ផែលោកជំទាវ កែវ ម៉ាលី នឹងប្រែក្លាយទៅជាគម្រោងអភិវឌ្ឍន៍ «មហាសមុទ្រទេសចរណ៍កំពត» ដូចជា សាងសង់កំពង់ផែ មណ្ឌលលំហែកាយ ខុនដូ និងតំបន់សេដ្ឋកិច្ចពិសេស ជាដើម៕
