កាលពីពេលថ្មីៗនេះ ក្រុមហ៊ុនថាមពលធំបំផុតមួយប្រចាំប្រទេសថៃគឺ PTT Plc និងក្រុមហ៊ុនផលិតយានយន្តអគ្គិសនីចិន Hozon បានចុះកិច្ចសន្យាយល់ព្រមពង្រីកទីផ្សាររថយន្តអគ្គិសនីនៅប្រទេសថៃ។ នេះបើតាមការដកស្រង់សម្ដីរបស់ក្រុមហ៊ុនទាំងពីរកាលពីថ្ងៃពុធ។
កិច្ចសន្យានោះគឺអនុញ្ញាតឲ្យមានការចែកចាយយានយន្តរបស់ក្រុមហ៊ុន Hozon ស្របពេលជាមួយគ្នានោះ ក៏ស្វែងរកឱកាសទីផ្សារដើម្បីសាងសង់រោងចក្រផលិតជាមួយក្រុមហ៊ុន PTTនិង Foxconn នៅក្នុងប្រទេសតែម្ដង។
បញ្ជាក់ដែរថា PTT គឺមានចំណែកភាគហ៊ុន ៥១,១% ដែលគ្រប់គ្រងដោយរដ្ឋាភិបាល ខណៈកាលពីខែកញ្ញាកន្លងទៅ ក្រុមហ៊ុនមួយនេះក៏បានប្រកាសពីសេចក្ដីព្រមព្រៀងជាមួយក្រុមហ៊ុនតៃវ៉ាន់ Foxconn សម្រាប់ការបង្កើតរោងចក្រផលិតយានយន្តអគ្គិសនីនៅក្នុងប្រទេសថៃផងដែរ។
ប្រទេសថៃគឺជាមជ្ឈមណ្ឌលដំឡើង និងនាំចេញរថយន្តធំជាងគេទីបួនរបស់អាស៊ី ក៏ដូចជាមូលដ្ឋានផលិតកម្មសម្រាប់ក្រុមហ៊ុនផលិតរថយន្តកំពូលដូចជា Toyota និង Great Wall Motor របស់ចិនជាដើម។
លើសពីនេះ រដ្ឋាភិបាលបានកំណត់គោលដៅថា 30% នៃផលិតកម្មរថយន្តក្នុងស្រុកនឹងក្លាយជារថយន្តអគ្គិសនីនៅឆ្នាំ ២០៣០។
រំលឹកដែរថា ផែនការផ្លាស់ប្ដូរឲ្យមានការប្រើប្រាស់យានយន្តដើរដោយថាមពលអគ្គិសនីគឺ ចក្ខុវិស័យថ្មីមួយរបស់ក្រុមហ៊ុន PTT ក្នុងការពង្រីកវិសាលភាពនៃអាជីវកម្មរបស់ពួកគេ និងគាំទ្រការប្រើប្រាស់ថាមពលកកើតឡើងវិញផងដែរ។
កន្លងមក PTT ធ្លាប់បានប្រកាសថា មានគម្រោងចង់បោះទុន ១ ទៅ ២ ពាន់លានដុល្លារសម្រាប់រយៈពេល ៦ ឆ្នាំបន្ទាប់ទៅលើវិស័យផលិតកម្មយានយន្តអគ្គិសនី ជាមួយនឹងសង្វាក់ផលិតកម្មប្រមាណ ៥ ម៉ឺនគ្រឿងក្នុងមួយឆ្នាំ៕
ប្រភព: bangkokpost
