តម្លៃ ៣៧៥ លានដុល្លារ អតីតប្រធានាធិបតី ត្រាំ ប្រកាសលក់សណ្ឋាគារដ៏ប្រណីតរបស់ខ្លួន

សណ្ឋាគារលំដាប់មួយ ដែលក្តោបក្តាប់ដោយក្រុមហ៊ុនគ្រួសាររបស់អតីតប្រធានាធិបតីអាមេរិក លោក Donald Trump បានឈានដល់ការចុះកិច្ចព្រមព្រៀងលក់សិទ្ធិរួចរាល់ហើយ ក្នុងតម្លៃប្រមាណ​ ៣៧៥ លានដុល្លារ។ នេះបើតាមកាសែត Wall Street Journal ចុះផ្សាយកាលពីពេលថ្មីៗកន្លងទៅ។

Wall Street Journal បាននិយាយថា សណ្ឋាគារដ៏ធំឈ្មោះថា Trump International Hotel ស្ថិតនៅក្នុងរដ្ឋវ៉ាស៊ីនតោន នឹងត្រូវលក់កម្មសិទ្ធិទៅឲ្យក្រុមហ៊ុនវិនិយោគ CGI Merchant Group  ដែលមានមូលដ្ឋាននៅទីក្រុងមៃអាមី ខណ:កិច្ចព្រៀមព្រៀងនេះ ត្រូវបានអ្នកជំនាញយល់ថានឹងបញ្ចប់ទៅក្នុងពេលឆាប់ៗខាងមុខ ។

បើតាមកាសែតដដែល CGI មានបំណងដកឈ្មោះ Trump ចេញពីសណ្ឋាគារនេះ ហើយបានឈានដល់ការចុះកិច្ចព្រមព្រៀងជាមួយ Hilton Worldwide Holdings ដើម្បីផ្ទេរសិទ្ធិគ្រប់គ្រង និងប្តូរឈ្មោះថ្មី ដោយដាក់ Waldorf Astoria group របស់ Hilton វិញ ។

សូមបញ្ជាក់ថា សណ្ឋាគារ Trump International Hotel ស្ថិតនៅក្នុងតំបន់អគារប្រវត្តិសាស្ត្រមួយ នៅមិនឆ្ងាយពីសេតវិមានអាមេរិកឡើយ ហើយ លោក Donal Trump បានជួយអគារនេះពីរដ្ឋាភិបាលផ្ទាល់តែម្តង ។ ចាប់តាំងពីពេលនោះមកសណ្ឋាគារនេះ បានក្លាយជាកន្លែងប្រមូលផ្តុំដ៏ពេញនិយម ពីសំណាក់អ្នកគាំទ្ររបស់លោក Trump និងជាពិសេសឥស្សរជនបរទេសធំៗ ។

បើតាមគណ:កម្មាធិការគ្រប់គ្រង Democratic-controlled committee បានរាយការណ៍ថា សណ្ឋាគារដ៏ប្រណីតនេះ អាចរកចំណូលឲ្យលោក Trump បានច្រើនជាង ១៥០ លានដុល្លារ ក្នុងអំឡុងពេលគាត់នៅកាន់កាប់ ប៉ុន្តែយ៉ាងណាក៏ដោយ គាត់ក៏បានខាតបង់ប្រមាណ ៧០ លានដុល្លារផងដែរ  ។

លើសពីនេះ គណ:កម្មាធិការខាងលើ បានរកឃើញទៀតថា សណ្ឋាគារនេះ បានទទួលការបង់ប្រាក់ជាង ៣,៧ លានដុល្លារ ពីរដ្ឋាភិបាលបរទេស ហើយបើគិតជាចំនួនស្នាក់នៅ គឺស្មើនឹងជាង ៧ ៤០០យប់ នៅក្នុងសណ្ឋាគារ ៕

ប្រភព: Kelo