តុលាការកំពូលប្រចាំប្រទេសឥណ្ឌាបានប្រាប់ទៅកាន់អាជ្ញាធរប្រចាំប្រទេស ឲ្យធ្វើការបិទក្រុមហ៊ុននៅរដ្ឋធានីញ៉ូវដេលី និងទីក្រុងជុំវិញនោះ ដោយអនុញ្ញាតឲ្យបុគ្គលិករាប់លាននាក់ធ្វើការនៅផ្ទះបណ្ដោះអាសន្ន។
មូលហេតុដែលធ្វើឲ្យរដ្ឋាភិបាលសម្រេចចិត្តធ្វើបែបនេះ គឺដោយសារបច្ចុប្បន្ននៅទីក្រុងញ៉ូវដេលី កំពុងមានបញ្ហាសាយភាយឧស្ម័នពុលធ្ងន់ធ្ងរដែលកើតមានឡើងតាំងពីដើមខែវិច្ឆិកាម៉្លេះ ដូច្នេះអាជ្ញាធរមូលដ្ឋានចាំបាច់រកដំណោះស្រាយជាបន្ទាន់សម្រាប់ករណីមួយនេះ។
ជាមួយគ្នានោះ តុលាការកំពូលប្រចាំប្រទេសក៏កំពុងរកដំណោះស្រាយជាមួយប្រជាកសិករ ដែលបានដុតកាកសំណល់លើដីចំការរបស់ពួកគេ ដើម្បីត្រៀមបង្កើតទិន្នផលថ្មីនៅទីក្រុងជុំវិញរដ្ឋធានីដូចជា Haryana, Punjab និង Uttar Pradesh ជាដើមផងដែរ។
មូលហេតុចំបងដែលធ្វើឲ្យមានការភាយឧស្ម័នពុលបែបនេះ គឺដោយសារការដុតកាកសំណល់កសិកម្មនេះឯង។ នេះបើយោងតាមរបាយការណ៍វិនិច្ឆ័យកម្រិតខ្យល់បានបង្ហាញថា ឧស្ម័ននៅទីក្រុង New Dehli ស្ថិតនៅចំណុច ៣៤៣/៥០០ កាលពីថ្ងៃច័ន្ទ ដែលជាសញ្ញាអាក្រក់បំផុតមួយ អាចបង្កឲ្យមានជំងឺដល់អ្នកស្រូបខ្យល់នោះផង។
លើសពីនេះ កាលពីសប្ដាហ៍មុនរដ្ឋធានីនៃប្រទេសឥណ្ឌាធ្លាប់ជួបហេតុការណ៍ធ្ងន់ធ្ងរជាងនេះទៅទៀត ពោលកម្រិតឧស្ម័នពុលធ្លាប់ធ្លាក់ដល់ ៤៩៩ ឯណោះ ដែលជាកម្រិតមួយអាក្រក់បំផុតទូទាំងសកលលោក ខណៈគេសន្មតថា វាកើតឡើងដោយសារការដុតសំរាមនៅទីសាធារណៈ និងរោងចក្រដុតធ្យូងថ្មនៅក្រៅទីក្រុង៕
ប្រភព: CNA
