ប្រិយមិត្តប្រហែលជាធ្លាប់បានឮពីគម្រោង Starlink Internet Services របស់ក្រុមហ៊ុន SpaceX ដែលជាក្រុមហ៊ុនផលិតយានអវកាសស្ថិតក្រោមការគ្រប់គ្រងរបស់មហាសេដ្ឋីមានបំផុតលើលោក Elon Musk ជាមិនខាន។
គម្រោង Starlink នេះនឹងអនុញ្ញាតឲ្យមនុស្សគ្រប់គ្នានៅលើផែនដីអាចប្រើប្រាស់អ៊ីនធឺណិតបានដោយសេរី ដោយគ្រាន់តែធ្វើការចុះឈ្មោះ និងទិញឧបករណ៍ភ្ជាប់ ខណៈបច្ចុប្បន្នវាកំពុងស្ថិតនៅដំណាក់កាលសិក្សាបន្ថែម។
យ៉ាងណា មិនមែនគ្រប់គ្នាសុទ្ធតែសប្បាយចិត្តជាមួយគម្រោងការណ៍នេះឡើយ។ ជាក់ស្ដែងរដ្ឋាភិបាលឥណ្ឌាបានចេញមុខហាមប្រាមមិនឲ្យប្រជាជនរបស់ខ្លួនធ្វើការចុះឈ្មោះ និងទិញនូវឧបករណ៍ភ្ជាប់ Starlink ឡើយ ដោយសារក្រុមហ៊ុន SpaceX មិនមានអាជ្ញាប័ណ្ណធ្វើប្រតិបត្តិការនៅក្នុងប្រទេស។
ដោយឡែក សេចក្តីថ្លែងការណ៍របស់រដ្ឋាភិបាលដែលបានចេញផ្សាយកាលពីល្ងាចថ្ងៃសុក្របាននិយាយថា Starlink ត្រូវបានណែនាំឱ្យគោរពតាមបទប្បញ្ញត្តិ និងបដិសេធពី “ការកក់/ផ្ដល់សេវាអ៊ីនធឺណិតតាមផ្កាយរណបនៅក្នុងប្រទេសឥណ្ឌាភ្លាមៗ” ។
យ៉ាងណា Starlink បានធ្វើការចុះបញ្ជីអាជីវកម្មរបស់ពួកគេនៅប្រទេសឥណ្ឌាកាលពីថ្ងៃទី ០១ វិច្ឆិកាកន្លងទៅ និងបានចាប់ផ្ដើមធ្វើការផ្សព្វផ្សាយ និងបើកឲ្យមានការបញ្ជាកក់ទំនិញមុនផងដែរ។ នេះបើតាមការអះអាងរបស់រដ្ឋាភិបាល ខណៈ Starlink សុំមិនមានយោបល់ជុំវិញបញ្ហាខាងលើនាពេលនេះ។
បញ្ជាក់ដែរថា Starlink មិនត្រឹមតែកំពុងមានបញ្ហានៅឥណ្ឌាឡើយ ពោលថ្មីៗនេះផ្កាយរណបរបស់ SpaceX រួមទាំងផ្កាយរណប Starlink នោះផងដែរ បានបង្ខំចិត្តគេចចេញពីគន្លងរបស់ពួកគេ ក្រោយរុស្ស៊ីធ្វើការបង្ហោះសាកល្បងគ្រាប់មីស៊ីលប្រឆាំងផ្កាយរណបកាលពីចុងខែវិច្ឆិកាកន្លងទៅ៕
ប្រភព: ndtv
