អ្នកឧកញ៉ាម៉ុង ឫទ្ធី កាលពីប៉ុន្មានថ្ងៃមុននេះ បានធ្វេីដំណើរឆ្លងកាត់តាមបណ្ដោយផ្លូវជាតិ ២ ដែលកំពុងស្ថាបនា ហើយចៃដន្យប្រទះឃើញកម្មករកំពុងរុះរើលូមុខ ១០០ ចំនួន ១២ កង់ ដែលមកដល់ពេលនេះមានអាយុកាលជាង ៤០ ឆ្នាំ។
អ្នកឧកញ៉ាមានងារជាសេដ្ឋីកសិកម្មបានរំលឹកពីប្រវត្តិលូ ១២ កង់នេះដែលទីតាំងនៅក្បែរបង្គោលគីឡូម៉ែត្រលេខ ៥០ តាមផ្លូវជាតិលេខ ២ ដែលកម្មករកំពុងរុះរើចេញ ដេីម្បីសាងសង់សារជាថ្មីឡេីងវិញ។
អ្នកឧកញ៉ារំលឹកពីប្រវត្តិនៃទីតាំងលូដែលក្រុមកម្មករកំពុងរុះរើនេះថា កាលពីសម័យសង្គ្រាមឆ្នាំ៧០-៧៥ ទីតាំងលូនេះត្រូវបានដាក់មីនកាត់ផ្តាច់។ ក្រោយរំដោះថ្ងៃ៧មករាឆ្នាំ១៩៧៩ ប្រជាជនមូលដ្ឋានបាននាំគ្នាយកឈេី មកធ្វេីស្ពានឆ្លងជាបណ្ដោះអាសន្ន។ ដោយសង្កេតឃេីញថាមានហានិភ័យខ្ពស់ អ្នកឧកញ៉ាក៏បានដឹកលូមុខ១ម៉ែត្រចំនួន១២កង់យកទៅដាក់ ជំនួសបានប្រេីប្រាស់អស់រយៈពេលជិត៤០ឆ្នាំ។
ទាក់ទងការរុះរើលូចាស់ចោលដែលបង្កប់ប្រវត្តិអនុស្សាវរីពីអតីតកាលនេះ អ្នកឧកញ៉ាក៏រីករាយឥតឧបមា ជាការបង្ហាញនូវដំណើរទៅមុខនៃការអភិវឌ្ឍស្រុកទេស ក្រោមការដឹកនាំរបស់ប្រមុខរដ្ឋាភិបាលសម្តេចតេជោ ហ៊ុន សែន។
អ្នកឧកញ៉ាម៉ុង ឫទ្ធី ត្រូវបានគេដឹងថាមានដើមកំណើតជាអ្នកខេត្តតាកែវ ដែលជាស្ថាបនិកនៃក្រុមហ៊ុន Mong Rithy Group Ltd ដែលផ្តោតលើវិស័យកសិកម្ម។ បច្ចុប្បន្នក្រៅពីមានមុខជំនួញជាច្រើននៅក្នុងដៃ អ្នកឧកញ៉ាក៏ជាសមាជិកព្រឹទ្ធសភានៃគណបក្សប្រជាជនកម្ពុជាផងដែរ៕
