ភ្នំពេញ៖ សម្តេចតេជោ ហ៊ុន សែន មានប្រសាសន៍ថា រាជរដ្ឋាភិបាលកម្ពុជា កំពុងយកចិត្តទុកដាក់ខ្ពស់ ក្នុងការលើកស្ទួយជីវភាពប្រជាកសិករ ជាពិសេសតាមរយៈការជំរុញផលិតកម្ម ការខិតខំរក្សាស្ថិរភាពថ្លៃកសិផល និងការពង្រីកទីផ្សារកសិផលជាដើម។ សម្តេចថ្លែងបែបនេះ នៅក្នុងពិធីរម្លឹកខួបលើក៤១នៃទិវាជ័យជម្នះ៧មករា នៅមហោស្រពកោះពេជ្រ។
ជាមួយគ្នានេះ សម្ដេច មានប្រសាសន៍ថា រាជរដ្ឋាភិបាលបានបង្កើនមូលនិធិឃុំ សង្កាត់ ក្នុងឆ្នាំ២០២០ ដោយឃុំ សង្កាត់នីមួយៗនឹងទទួលបានថវិកាសរុបជាមធ្យមប្រមាណ ១២២.០០០ដុល្លារអាម៉េរិក ក្នុងនោះថវិកាសម្រាប់ផ្នែកអភិវឌ្ឍន៍មូលដ្ឋានមានប្រមាណ៧០.០០០ដុល្លារ ហើយថវិកាផ្នែកអភិវឌ្ឍន៍មូលដ្ឋាននេះនឹងត្រូវបង្កើនជារៀងរាល់ឆ្នាំ។ សម្ដេចតេជោបានបន្ដថា រហូតដល់ឆ្នាំ២០២៣ រដ្ឋបាលឃុំ សង្កាត់ នីមួយៗនឹងទទួលបានថវិកាសរុបជាមធ្យមជាង ១៣២.០០០ដុល្លារ។
សម្តេចបន្ថែមថា អត្រាភាពក្រីក្រត្រូវបានកាត់បន្ថយមកក្រោម ១០ភាគរយ នាពេកបច្ចុប្បន្ន។ សម្ដេចតេជោនាយករដ្ឋមន្ត្រីបានបន្តថា រាជរដ្ឋាភិបាលបានផ្តល់ប្រព័ន្ធគាំពារចំនួន២ រួមមាន ប្រព័ន្ធជំនួយសង្គមផ្តល់ការគាំពារដល់ប្រជាជនដែលក្បែរបន្ទាត់ភាពក្រីក្រ ដោយផ្តោតជាពិសេសលើកុមារ ស្ត្រីមានផ្ទៃពោះ ជនពិការ ជនចាស់ជរាគ្មានទីពឹង និងប្រព័ន្ធ សន្តិសុខសង្គម ផ្តល់ការគាំពារហានិភ័យលើផ្នែកសោធន ថែទាំសុខភាព ហានិភ័យការងារ ពិការភាព ដល់ក្រុមប្រជាជននៃវិស័យសេដ្ឋកិច្ចទាំងក្នុង និងក្រៅប្រព័ន្ធ។ រាជរដ្ឋាភិបាលបានផ្ដល់ប្រាក់ឧបត្ថម្ភជូនកម្មការិនីដែលបានសម្រាលកូនតាមរយៈបេឡាជាតិរបបសន្តិសុខសង្គម ហើយបានដាក់ឱ្យអនុវត្តន៍ ការឧបត្ថម្ភសាច់ប្រាក់ជូនស្រ្តីមានផ្ទៃពោះ និងកូនអាយុក្រោម២ឆ្នាំ នៃគ្រួសារមានប័ណ្ណសមធម៌ ឬប័ណ្ណអទិភាព ដើម្បីសម្រាលបន្ទុក លើកកម្ពស់ជីវភាព និងអាហារូបត្ថម្ភដល់ស្ត្រី និងកុមារ។
លើសពីនេះទៀត រាជរដ្ឋាភិបាលក៏បាន សម្រេចបង្កើតមូលនិធិគន្ធបុប្ផាកម្ពុជា ដើម្បីផ្តល់ការគាំពារផ្នែកសុខភាពប្រកបដោយគុណភាព និងមិនគិតថ្លៃដល់កុមារកម្ពុជា។ សម្រាប់មន្ត្រីរាជការ និងកងកម្លាំងប្រដាប់អាវុធ ទទួលបានការដំឡើងបៀវត្សរ៍ចាប់ពីខែមករា និងខែមេសាឆ្នាំ២០២០នេះ៕
