ក្រុមហ៊ុនបុត្រសម្ព័ន្ធរបស់ក្រុមហ៊ុនមេ Swire Pacific Limited គឺក្រុមហ៊ុន Swire Coca-Cola Limited សម្រេចទិញភាគហ៊ុនក្រុមហ៊ុនបុត្រសម្ព័ន្ធ Coca-Cola ក្នុងប្រទេសកម្ពុជា និងវៀតណាម ដើម្បីពង្រីកអាជីវកម្មរបស់ខ្លួនទៅក្នុងតំបន់អាស៊ីអាគ្នេយ៍។
សេចក្តីប្រកាសរបស់ក្រុមហ៊ុន កាលពីថ្ងៃទី ១៨ ខែកក្កដា ឆ្នាំ២០២២ បានឱ្យដឹងថា ប្រតិបត្តិការទិញនេះ គឺជាការវិនិយោគដំបូងរបស់ក្រុមហ៊ុន Swire Coca-Cola ក្នុងតំបន់អាស៊ីអាគ្នេយ៍ ហើយក្រុមហ៊ុននឹងផ្តល់នូវតួនាទីឈានមុខគេនៅក្នុងទីផ្សារភេសជ្ជៈដែលរីកចម្រើនរហ័សបំផុតមួយរបស់ពិភពលោក។
បន្ទាប់ពីការបញ្ចប់កិច្ចព្រមព្រៀងទិញនេះ Swire Coca-Cola នឹងគ្រប់គ្រង និងដំណើរការរបស់ក្រុមហ៊ុន Coca-Cola Beverages Vietnam Ltd ដែលមានរោងចក្រផលិតដបចំនួន ៣ នៅប្រទេសវៀតណាម និងក្រុមហ៊ុន Cambodia Beverage Company Ltd. ដែលមានរោងចក្រនៅកម្ពុជា។
លើសពីនេះ នៅពេលបញ្ចប់ការទិញភាគហ៊ុននេះចំនួនអតិថិជនរបស់ក្រុមហ៊ុន Swire Coca-Cola នឹងកើនឡើងចំនួន ១៥ ភាគរយ ដល់ ៨៧៦ លាននានាក់។
គួររំឭកថា ក្រុមហ៊ុន Swire ដែលមានមូលដ្ឋាននៅហុងកុងមួយនេះ មានអាយុកាល ២០៦ឆ្នាំហើយ ខណៈពេលបច្ចុប្បន្នក្រុមហ៊ុនកំពុងផ្តោតលើការវិនិយោគក្នុងវិស័យសំខាន់ៗមួយចំនួច រួមមាន៖ អចលទ្រព្យ ភេសជ្ជៈ ការថែទាំសុខភាព និងជាម្ចាស់ក្រុមហ៊ុនអាកាសចរណ៍ Cathay Pacific Airways Ltd.៕
