សមាគមឧកញ៉ាកម្ពុជា នៅថ្ងៃទី២០ ខែកក្កដា ឆ្នាំ២០២០ បានផ្ញើលិខិតរំលែកមរណទុក្ខជូនចំពោះ អ្នកឧកញ៉ា សំ អាង ទីប្រឹក្សាជាន់ខ្ពស់នៃសមាគមឧកញ៉ាកម្ពុជា និងលោកជំទាវអ្នកឧកញ៉ា ឈុន លាង, អ្នកឧកញ៉ា ឡាយ ប៊ុនប៉ា សមាជិកសកម្មនៃសមាគមឧកញ៉ាកម្ពុជា និងលោកជំទាវ ព្រមទាំងក្រុមគ្រួសារ ចំពោះមរណភាពរបស់ មហាសទ្ធាភិរ័ក្ខញាណ ហ៊ី ឡាយ អគ្គមហាឧបាសកពុទ្ធសាសនូបត្ថម្ភក៏ ដែលជាត្រូវជាឪពុកក្មេករបស់អ្នកឧកញ៉ា សំ អាង អ្នកឧកញ៉ា ឡាយ ប៊ុនប៉ា និងត្រូវជាជីតារបស់ ឧកញ៉ា ឃន ឈុនដារ៉ា ឧកញ៉ា តាន់ បូរ័ត្ន និងឧកញ៉ា ឡាយ ប៊ុណ្ណាវឌ្ឍន៍។
លិខិតរបស់សមាគមឧកញ៉ាកម្ពុជា បានបញ្ជាក់ខ្លឹមសារបន្ថែមដូច្នេះថា៖ “ក្នុងវេលាដែលប្រកបដោយទុក្ខព្រួយដ៏សោកសង្រេងជាទីបំផុតនេះ យើងខ្ញុំទាំងអស់គ្នា សូមចូលរួមរំលែកមរណទុក្ខដ៏ក្រៀមក្រំជាមួយ អ្នកឧកញ៉ា ឧកញ៉ា និងលោកជំទាវ ព្រមទាំងក្រុមគ្រួសារ ដោយសេចក្តីអាឡោះអាល័យរកអ្វីប្រៀបផ្ទឹមពុំបាន ចំពោះការបាត់បង់ឪពុកបង្កើត ឪពុកក្មេក ជីតា ជីតាទួត ជាទីគោរពស្រឡាញ់យ៉ាងជ្រាលជ្រៅបំផុត ដែលពោរពេញទៅដោយព្រហ្មវិហារធម៌ និងបានលះបង់បូជាកម្លាំងចិត្តគ្រប់សព្វបែបយ៉ាងក្នុងការបីបាច់ថែរក្សា បុត្រា បុត្រី ចៅប្រុស ចៅស្រី ឱ្យក្លាយជាពលរដ្ឋដ៏ល្អសម្រាប់សង្គមជាតិ។ យើងខ្ញុំទាំងអស់គ្នា សូមឧទ្ទិសបួងសួងដល់ដួងវិញ្ញាណក្ខន្ធ មហាសទ្ធាភិរ័ក្ខញាណ ហ៊ី ឡាយ អគ្គមហាឧបាសកពុទ្ធសាសនូបត្ថម្ភក៏ សូមបានបដិសន្ធិក្នុងសុគតិភពកុំបីឃ្លៀងឃ្លាតឡើយ”។
មហាសទ្ធាភិរ័ក្ខញាណ ហ៊ី ឡាយ អគ្គមហាឧបាសកពុទ្ធសាសនូបត្ថម្ភក៏ បានទទួលមរណភាព កាលពីថ្ងៃសៅរ៍ ១៥កើត ខែអាសាឍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២០ ខែកក្កដា ឆ្នាំ២០២៤ វេលាម៉ោង ៦.១២នាទីព្រឹក ក្នុងជន្មាយុ ៩៧ឆ្នាំដោយជរាពាធ៕
