អ្នកឧកញ៉ា សៀ ឬទ្ធី អនុប្រធានសមាគមឧកញ៉ាកម្ពុជាបានដឹកនាំប្រតិភូសមាគមឧកញ៉ាកម្ពុជា ចូលរួមអមដំណើរឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជាអញ្ជើញបំពេញទស្សនកិច្ចផ្សារ Rungis Wholesale Market ដែលជាផ្សារបោះដុំធំមួយក្នុងប្រទេសបារាំង និងបន្តអញ្ជើញពិសាអាហារធុរកិច្ចជាមួយលោក Stéphane Layani នាយកប្រតិបត្តិក្រុមហ៊ុន SEMMARIS ផងដែរ កាលពីថ្ងៃអង្គារ ទី៥ ខែវិច្ឆិកា ឆ្នាំ២០២៤។
ក្នុងដំណើរទស្សនកិច្ចនាឱកាសនេះ ថ្នាក់ដឹកនាំក្រុមហ៊ុនបានផ្ដល់ការស្វាគមន៍យ៉ាងកក់ក្ដៅចំពោះប្រតិភូកម្ពុជា និងបានធ្វើបទបង្ហាញជូន ឯកឧត្តមឧបនាយករដ្ឋមន្ត្រី អំពីបច្ចុប្បន្នភាពនៃផ្សារ Rungis Wholesale Market ដែលធ្វើការបោះដុំ និងផ្គត់ផ្គង់អាហារដ៏ធំមួយក្នុងប្រទេសបារាំង។
សូមជម្រាបថា អ្នកឧកញ៉ា សៀ ឬទ្ធី អនុប្រធានសមាគមឧកញ៉ាកម្ពុជា និងជាប្រធានគណៈកម្មការទំនាក់ទំនងសាធារណៈ និងអន្តរជាតិ កំពុងដឹកនាំប្រតិភូសមាគមឧកញ៉ាកម្ពុជា ដែលមានសមាសភាពដូចជា អ្នកឧកញ៉ា ហ៊ុន ឡាក់ ជំទាវអ្នកឧកញ៉ា គួន ធីតា និង ឧកញ៉ា លាង ពៅ ដើម្បីចូលរួមអមដំណើរ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ក្នុងបេសកកម្មទាក់ទាញ និងជំរុញវិនិយោគនៅសាធារណរដ្ឋបារាំង សាធារណរដ្ឋឆែក និងចក្រភពអង់គ្លេស ចាប់ពីថ្ងៃទី៣ ដល់ថ្ងៃទី១៣ ខែវិច្ឆិកា ឆ្នាំ២០២៤៕
