និយាយដល់ឈ្មោះ Gumball 3000 បងប្អូនអ្នកស្រឡាញ់ ចូលចិត្តឡានទំនើបៗបែប Supercar, Hyper Carនិងឡានដែលមានតម្លៃវាល់លានដុល្លារប្រកដជាបានស្គាល់ពី Gumball 3000 នេះហើយ។ Gumball 3000 គឺជាព្រឹត្តិការណ៍ប្រមូលផ្ដុំនូវរថយន្តទំនើបៗ និងបុគ្គលមានឥទ្ធិពលជាច្រើនរូប ដែលធ្វើដំណើរឆ្លងកាត់ពីប្រទេសមួយទៅប្រទេសមួយ គ្រប់ទ្វីបជុំវិញពិភពលោក។ កាន់តែអស្ចារ្យ និងមិនធ្លាប់មានសម្រាប់ប្រជាជនកម្ពុជាដែលស្នេហាព្រឹត្តិការណ៍នេះ ដោយ Gumball 3000 បានធ្វើការទំនាក់ទំនងមកកាន់ក្រុមហ៊ុន ជីប ម៉ុង ដើម្បីស្នើរសុំធ្វើជាដៃគូសហការក្នុងការរៀបចំមហាព្រឹត្តិការណ៍Gumball 3000 នៅកម្ពុជា ក្នុងដំណើរយុទ្ធនាការរបស់ខ្លួននៅអាស៊ីអាគ្នេយ៍។
Gumball 3000 នៅកម្ពុជានេះ នឹងរៀបចំនូវមហាព្រឹត្តិការណ៍ដ៏អស្ចារ្យមិនធ្លាប់មាន ដោយមានការដាក់តាំងបង្ហាញរថយន្ត Supercar, Superstar និង Hyper Car របស់ Gumball និង Rev Up Cambodia ជាច្រើនរយគ្រឿង អមជាមួយការប្រគំតន្ត្រីខ្នាតយក្សទៀតផង។ រាល់សកម្មភាព និងព្រឹត្តិការណ៍ Gumball 3000 នៅកម្ពុជាទាំងអស់ ត្រូវបានសម្របសម្រួល និងរៀបចំឡើងដោយក្រុមហ៊ុនយក្ស ជីប ម៉ុង ក៏ដូចជាទទួលបានការគាំទ្រពីក្រសួងទេសចរណ៍នៃព្រះរាជាណាចក្រកម្ពុជាផងដែរ។
គួរបញ្ជាក់ផងដែរថា ក្រុមហ៊ុន ជីប ម៉ុង គឺជាក្រុមហ៊ុនយក្សតែមួយគត់នៅកម្ពុជា ដែល Gumball 3000 បានធ្វើការទំនាក់ទំនងមកដើម្បីធ្វើកិច្ចសហការ និងរៀបចំមហាព្រឹត្តិការណ៍នេះ។ ព្រោះតែភាពល្បីល្បាញជាច្រើនទសវត្សនៃក្រុមហ៊ុន ជីប ម៉ុង ថាជាក្រុមហ៊ុនលំដាប់ពិភពលោកមួយនៅអាស៊ី ជាក្រុមហ៊ុនដែលវិនិយោគទៅលើវិស័យធំៗជាច្រើន និងមានដៃគូពាណិជ្ជកម្មជាច្រើននៅលើពិភពលោកផងនោះ ហេតុដូច្នេះហើយទើប Gumball 3000 មានទំនុកចិត្ត និងស្នើរសុំជាដៃគូសហការក្នុងការសម្របសម្រួល និងរៀបចំមហាព្រឹត្តិការណ៍ដ៏អស្ចារ្យ មិនធ្លាប់មានពីមុនមកនេះឡើងនៅកម្ពុជា។
ក្នុងភាពជាដៃគូការសហការរៀបចំមហាព្រឹត្តិការណ៍ Gumball 3000 នៅកម្ពុជានេះ ក្រុមហ៊ុ ជីប ម៉ុង ក៏ដូចជាក្រសួងទេសចរណ៍នៃព្រះរាជាណាចក្រកម្ពុជានឹងអនុញ្ញាតឱ្យទស្សនិកជនទាំងអស់ ចូលរួមទស្សនាកម្សាន្តសេរី ដោយឥតគិតថ្លៃ៕
