ក្រសួងទេសចរណ៍ បានកំពុងជំរុញការសិក្សាលទ្ធភាពទទួលភ្ញៀវទេសចរអន្តរជាតិដែលចាក់វ៉ាក់សាំងរួច ហើយ ដែលនិងរំពឹងថាអាចចាប់ផ្តើមនៅក្នុងត្រីមាសទី៤ ឆ្នាំ២០២១ខាងមុខនេះ ដើម្បីសង្គ្រោះឧស្សាហកម្មទេសចរណ៍របស់កម្ពុជាឡើងវិញ ដែលកំពុងជួបវិបត្តិយ៉ាងធ្ងន់ធ្ងរពីជំងឺរាតត្បាតកូវីដ១៩ ។
សូមចុច Subscribe Telegram oknha_news ដើម្បីទទួលបានព័ត៌មានគ្រប់សកម្មភាពឧកញ៉ា អាជីវកម្ម ចែករំលែក ជោគជ័យ
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានសម្ដែងក្ដីសាទរចំពោះការសិក្សាលទ្ធភាពទទួលភ្ញៀវទេសចរអន្តរជាតិឡើងវិញ ដែលជាច្រកចេញតែមួយគត់អាចជួយសង្រ្គោះវិស័យទេសចរណ៍នៅកម្ពុជាឱ្យមានសន្ទុះឡើងវិញ។
លោកស្រីបានលើកឡើងយ៉ាងដូច្នេះថា ក្រសួងគួរទាក់ទាញភ្ញៀវទេសចរដែលមានចំណូលខ្ពស់ ជាពិសេសភ្ញៀវធ្វើដំណើរតាមនាវា ដោយសារចំណូលរបស់ភ្ញៀវទាំងនោះមិនសូវប៉ះពាល់ខ្លាំងដោយសារជំងឺកូវីដ១៩ទេ។ លោកស្រីសង្កេតឃើញថា ក្នុងចំណោមភ្ញៀវទេសចរណ៍ធ្វើដំណើរតាមនាវាទាំងអស់ មានប្រមាណតែ១០ភាគរយប៉ុណ្ណោះដែលចុះមកទស្សនាកម្ពុជា ដោយសារការផ្គត់ផ្គង់ និងផលិតផលរបស់យើងនៅមានកម្រិតនៅឡើយ។
លោកស្រី ឆាយ ស៊ីវលីន បានអំពាវនាវឱ្យមានការសម្របសម្រួលដល់ភ្ញៀវដូចជាការចូលចតនាវា និងទិដ្ឋការធ្វើដំណើរជាដើម ក្នុងន័យបង្កលក្ខណៈងាយស្រួលដល់ពួកគេចូលមកទស្សនាប្រទេសកម្ពុជា។ ប្រសិនបើការសម្របសម្រួលទាមទារពេលវេលាយូរពេក តឹងតែងពេក ភ្ញៀវទេសចរណ៍ប្រហែលជាមិនចង់ចូលមកទេ ព្រោះពួកគេមានតារាងពេលវេលាកៀកៗគ្នាដែរ។
បន្ថែមពីនេះទៅទៀត ប្រធានទីភ្នាក់ងារទេសចរណ៍កម្ពុជារូបនេះ ក៏ស្នើដល់ក្រសួងប្រកាសលិខិតទាក់ទងនឹងអ្នកធ្វើដំណើរមកកម្ពុជាឱ្យបានឆាប់ និងចែងឱ្យបានច្បាស់លាស់ ដើម្បីឱ្យភ្ញៀវទាំងនោះត្រៀមលក្ខណៈអាចចូលមកទស្សនាប្រទេសកម្ពុជាបាន។
ឯកឧត្តមបណ្ឌិត ថោង ខុន រដ្ឋមន្រ្តីក្រសួងទេសចរណ៍ បានមានប្រសាសន៍ថា ក្នុងជំហានដំបូងក្រសួងនឹងធ្វើការជាមួយក្រសួងសុខាភិបាលអំពីលក្ខខណ្ឌសម្រាប់ការបើកទីផ្សារទេសចរណ៍ឡើងវិញនេះ។
“ជាគោលការណ៍ភ្ញៀវទេសចរអន្តរជាតិដែលបានចាក់វ៉ាក់សាំងរួច អាចចូលមកប្រទេសកម្ពុជានោះ តម្រូវឲ្យធ្វើចត្តាឡីស័កក្នុងកម្រិតណា ឬមិនចាំបាច់ទេ”។
ឯកឧត្តមសង្កត់ធ្ងន់ថា ដើម្បីត្រៀមទទួលភ្ញៀវទេសចរអន្តរជាតិ ទី១គឺការកសាងឲ្យបាននូវទំនុកចិត្តដល់អ្នកទេសចរណ៍ ទី២គឺគុណភាព និងសេវាកម្មផលិតផលទេសចរណ៍រួមទាំងតម្លៃឲ្យបានសមរម្យ និងទី៣គឺការសម្រួលការធ្វើដំណើរដល់ទេសចរនៅតាមច្រកទ្វារអន្តរជាតិ។
ប្រទេសមួយចំនួននៅក្នុងតំបន់អាស៊ានដូចជា ប្រទេសសិង្ហបុរី និងប្រទេសថៃ បានបង្ហាញពីផែនការបើកទទួលភ្ញៀវទេសចរអន្តរជាតិដែលបានចាក់វ៉ាក់សាំងបង្ការជំងឺកូវីដ១៩ ដើម្បីសង្គ្រោះសេដ្ឋកិច្ចរបស់ខ្លួននាពេលខាងមុខនេះ។
យោងតាមរបាយការណ៍ក្រសួងទេសចរណ៍ បានឲ្យដឹងថា កាលពីឆ្នាំ២០២០កន្លងទៅនេះ កម្ពុជាទទួលបានភ្ញៀវទេសចរអន្តរជាតិតែ ១,៣១លាននាក់ប៉ុណ្ណោះ ដោយមានការថយចុះប្រមាណ ៨០% និងទទួលបានភ្ញៀវទេសចរផ្ទៃក្នុងប្រមាណ ៩ លាននាក់ ថយចុះ ២០% បើធៀបនឹងឆ្នាំ២០១៩ កន្លងទៅ។ ការធ្លាក់ចុះនៃចំនួនភ្ញៀវទេសចរអន្តរជាតិកាលពីឆ្នាំមុន បានធ្វើឲ្យឧស្សាហកម្មទេសចរណ៍កម្ពុជា បាត់បង់ចំណូលជាង ៣ពាន់លានដុល្លារអាមេរិក៕
ប្រភព៖ កម្ពុជាថ្មី
