ភាពយន្តខ្នាតធំរឿង “នាឡិកា ដាស់វិញ្ញាណ” របស់LD Pictureត្រៀមនិងចាក់បញ្ចាំងជាផ្លូវបានហើយ នៅគ្រប់រោង នាថ្ងៃទី២១ វិច្ឆិកា ឆ្នាំ ២០១៩ ខាងមុខនេះ។ នៅបើតាមឲ្យដឹងក្នុងសន្និសីទសារព័ត៌មានកាលពីម្សិលមិញ នៅរោងភាពយន្ត អេឌីន សាខាទួលគោក។ ភាពយន្តមួយនេះបានចំណាយដើមទុកក្នុងការផលិតរហូតដល់ទៅជាង៤០ម៉ឺនដុល្លារអាមេរិកឯណោះ ក្រៅពីការចាក់បញ្ចាំងនៅក្នុងស្រុក ភាពយន្តមួយនេះ គ្រោងនិងយកទៅចាក់បញ្ចាំង លើ ឆាកអន្តជាតិជាច្រើនប្រទេសថែមទៀតផង។
លោក លៀក លីដា ម្ចាស់ផលិតកម្ម LD Picture បានថ្លែងបញ្ជាក់ថា នេះជាភាពយន្ត ដែលលោកចំណាយពេលផលិតជិត១ឆ្នាំ និងជាភាពយន្តខ្នាតធំ លើកដំបូង ដែលលោកហ៊ានចំណាយដល់ជាង៤០ម៉ឺនដុល្លារ ដោយសារតែចង់ បានភាពយន្តមួយ ដែលមានរសជាតិភ័យរន្ធត់ កម្សត់ និងអប់រំ ប្រកបស្ដង់ដារ កម្រិតអន្តរជាតិ ប្រកួតប្រជែងក្នុងវិស័យភាពយន្ត។ 
ភាពយន្តមួយនេះ មិនត្រឹមតែជាស្នាដៃ ផលិតរបស់អ្នកឯកទេសក្នុងស្រុកប៉ុណ្ណោះទេ តែក៏មានការចូលរួមពីផលិតករហ្វីលីពីន និងរួមផ្សំពីបច្ចេកទេសទំនើបផងដែរ ទើបធ្វើឲ្យភាពយន្ត”នាឡិកា ដាស់វិញ្ញាណ” របស់លោក ទទួលស្គាល់ដោយអ្នកឯកទេសភាពយន្ត។ 
លោកកាន់តែមោទនភាព ដែលភាពយន្តនេះ ក្រោយការបង្ហាញជូនផលិតករ និងម្ចាស់រោងភាពយន្ត នៅក្រៅប្រទេស ទទួលបានកុងត្រា សម្រាប់ដាក់បញ្ចាំង៦«ប្រទេសភ្លាមៗ ដោយនឹងដំណើរការចេញបញ្ចាំង ចាប់ពីអំឡុងខែធ្នូតទៅ។ ប្រទេសដែលបានកុងត្រា ទទួលបញ្ចងរឿង”នាឡិកា ដាស់វិញ្ញាណ” របស់លោក រួមមានប្រទេសថៃ ឡាវ មីយ៉ាន់ម៉ា ម៉ាឡេស៊ី សិង្ហបូរី និងប្រ៊ុយណេជាដើម។
យ៉ាងណាមិញលោកមិនរំពឹងថា នឹងចំណេញពីការ ដាក់បញ្ចាំងនេះទេ ដោយលោកគ្រាន់ តែដឹងថា គឺជាការផ្សព្វផ្សាយ ភាពយន្តខ្លាំងមួយ របស់ផលិតករក្នុងស្រុក ដើម្បីឲ្យប្រទេសទាំងនោះដឹងថា ខ្មែរក៏មានសមត្ថភាពផលិតភាពយន្តស្ដង់ដារប៉ុណ្ណោះ។ លោកថា ការចំណាយខាងលើ លោករំពឹងបានត្រឹមប្រាក់មកវិញ ត្រឹមតែពាក់កណ្ដាលប៉ុណ្ណោះ។
ជាមួយក្នុងការសន្និសីទបង្ហាញភាពយន្ត ដែលបានធ្វើឡើងនេះ គេឃើញមានវត្តផលិតករឆ្នើមៗ ជាច្រើនចូលរួម។ តាមគម្រោងភាពយន្តនេះ នឹងបើកសម្ពោធធំម្ដងទៀតនៅថ្ងៃទី១៩ វិច្ឆិកា ម្ដងទៀត ដើម្បីដាក់បញ្ចាំងផ្លូវការគ្រប់រោង នៅថ្ងៃទី២១ វិច្ឆិកា ឆ្នាំ២០១៩៕
