នាថ្ងៃចុងសប្ដាហ៍ទី១ ខែមេសា ពោលគឺនៅថ្ងៃទី០២ និងថ្ងៃទី០៣ ខែមេសា ឆ្នាំ២០២២ នៅទូទាំងប្រទេសកម្ពុជា ទទួលបានភ្ញៀវសរុបមានចំនួន ២១២,៨៣៦នាក់ ក្នុងនោះភ្ញៀវជាតិ ១៩៩,១១៣នាក់ និងភ្ញៀវបរទេសផ្ទៃក្នុង ១៣,៧២៣នាក់។ នេះបានតាមការអោយដឹងពីលោក ថោង ខុន រដ្ឋមន្ត្រីក្រសួងទេសចរណ៍ ។
លោក ថោង ខុន រដ្ឋមន្ត្រីក្រសួងទេសចរណ៍ បានបន្តថា ចរន្តភ្ញៀវកាលពីចុងសប្តាហ៍កន្លងទៅនេះ មានសន្ទុះកើនឡើងវិញបន្តិច បន្ទាប់ពីមានការថមថយនា២សប្តាហ៍ចុងក្រោយ ដែលជះឥទ្ធិពលពីការកើនឡើងតំលៃប្រេងសាំង។ ជាក់ស្តែង តួលេខខាងលើ មានការកើនឡើងប្រមាណ ៣,១% ធៀបនឹងចុងសប្តាហ៍កន្លងមក។ទន្ទឹមនឹងនេះនាចុងសប្តាហ៍ពិសេសថ្ងៃអាទិត្យ មានប្រជាពលរដ្ឋដែលជាប់ខ្សែស្រឡាយចិន បានចេញធ្វើដំណើរទៅស្រុកកំណើត ដើម្បីធ្វើពិធីសែនឆេងម៉េង ដែលបានចរាចរណ៍នាតាមដង ផ្លូវជាតិមួយចំនួនមានការកកកុញតាំងពីព្រឹកព្រលឹម។
លោករដ្ឋមន្ត្រី បានបន្តទៀតថា នៅបណ្តារាជធានីខេត្ត បាននឹងកំពុងពន្លឿនការរៀបចំព្រឹត្តិការណ៍នានា ដើម្បីអបអរសាទរ និងកម្សាន្តសប្បាយនាពិធីបុណ្យ ចូលឆ្នាំប្រពៃណីជាតិខាងមុខ។ ជាមួយគ្នានេះ ក្រសួងទេសចរណ៍ ក៏បានដាក់ចេញសារាចរណែនាំដល់មន្ទីរទេសចរណ៍ ឲ្យខិតខំសហការជាមួយរដ្ឋបាលរាជធានីខេត្ត និងមន្ទីរជំនាញពាក់ព័ន្ធ ក្នុងការគ្រប់គ្រងចរន្តភ្ញៀវទេសចរ ការពង្រឹងការអនុវត្តវិធានការទប់ស្កាត់ជំងឺកូវីដ-១៩ រួមជាមួយការពង្រឹងគុណភាពផលិតផល និងសេវាកម្ម ទេសចរណ៍ នាឱកាសពិធីបុណ្យចូលឆ្នាំខាងមុខនេះផងដែរ ។
គួរបញ្ជាក់ថា នាថ្ងៃចុងសប្ដាហ៍ទី១ ខែមេសា ឆ្នាំ២០២២ ខេត្តដែលជាគោលដៅទេសចរណ៍សំខាន់ៗ ដែលមានភ្ញៀវទៅលេងកម្សាន្តច្រើន រួមមាន ខេត្តព្រះសីហនុ ៣១,៧២៣នាក់ រាជធានីភ្នំពេញ ២៧,៨៥០នាក់ ខេត្តកំពត ២៥,៥៦៤នាក់ ខេត្តបាត់ដំបង ២៣,២១៧នាក់ ខេត្តសៀមរាប ២១,៦១៥នាក់ ខេត្តកែប ១៦,៣៨២ នាក់ និង ខេត្តពោធិ៍សាត់ ១២,៩៦៨នាក់ ៕ អត្ថបទ៖ ពុធិកា
