ដើម្បីជាការរួមចំណែកជាមួយរាជរដ្ឋាភិបាលកម្ពុជាក្នុងការទប់ស្កាត់ និងព្យាបាលជំងឺកូវីដ-១៩ តារាស្រីរូបស្រស់ កញ្ញា កែវ នីសា បានសម្រេចបរិច្ចាគថវិកាផ្ទាល់ខ្លួនចំនួន ៤ ៤៤៤ ដុល្លារខណៈដែលសកម្មភាពនេះ ទទួលបានការគាំទ្រពីមហាជនខ្មែរគ្រប់មជ្ឈដ្ឋានផងដែរ។
ទឹកប្រាក់ ៤ ៤៤៤ ដុល្លារ ដែលត្រូវ បានតារាស្រីសំឡេងស្រទន់ កញ្ញា កែវ នីសា បានបរិច្ចាគដើម្បីចូលរួមប្រយុទ្ធប្រឆាំងជំងឺកូវីដ-១៩ នាពេលនេះ បានធ្វើឲ្យមហាជនកោតសរសើរ ដែលជាទង្វើដ៏ល្អសម្រាប់សង្គមក្នុងនាមខ្មែរស្រលាញ់ខ្មែរ ខ្មែរចេះជួយខ្មែរ អំឡុងពេលដែលកំពុងជួបប្រទះនូវបញ្ហាលំបាក នៃការឆ្លងរីករាលដាលជំងឺដ៏កាចសាហាវកូវីដ-១៩។
ជាមួយគ្នានេះដែរ កញ្ញា កែវ នីសា ក៏ទទួលបានលិខិតថ្លែងអំណរគុណពីសំណាក់ សម្ដេចតេជោ ហ៊ុន សែន នាយករដ្ឋមន្ត្រី នៃប្រទេសកម្ពុជា បន្ទាប់ពីនាងបានបរិច្ចាគថវិកា ដើម្បីចូលរួមទប់ស្កាត់ការរីករាល និងព្យាបាលជំងឺកូវីដ-១៩ នៅប្រទេសកម្ពុជាផងដែរ។
សូមបញ្ជាក់ថា បន្ទាប់ពីមានការអំពាវនាវរបស់ សម្ដេចតេជោ ហ៊ុន សែន ដើម្បីឲ្យចូលរួមបរិច្ចាគថវិការួមគ្នាជួយទប់ទល់ការរីករាលដាលជំងឺCovid-19 នៅប្រទេសកម្ពុជានោះ ភ្លាមៗនេះដែរ គេសង្កេតឃើញថា មានការចែករំលែកសកម្មភាពមនុស្សធម៌យ៉ាងផុសផុលពីសំណាក់អ្នកជំនួញ ឯកឧត្ដម លោកឧកញ៉ាល្បីៗ និងមន្ត្រីរាជការគ្រប់លំដាប់ថ្នាក់ ខណៈដែលសិល្បករ-សិល្បការិនីរបស់ខ្មែរជាច្រើន ក៏បានបង្ហាញឆន្ទៈរួបរួមគ្នាចូលរួមឧបត្ថម្ភថវិកាទប់ស្កាត់ និងព្យាបាលជំងឺCovid-19ផងដែរ។
យោងតាម សម្តេចតេជោហ៊ុនសែន នាយករដ្ឋមន្ត្រីកម្ពុជា បានបង្ហោះសារនៅក្នុងហ្វេសប៊ុកផេក ផ្លូវការ បានបង្ហាញអំពីថវិកាដែលសប្បុរសជនចូលរូមបរិច្ចាក ដើម្បីប្រយុទ្ធប្រឆាំងជាមួយជំងឺកូវីដ ១៩ «គិតត្រឹមព្រឹកថ្ងៃ១៧ មេសា ២០២០កន្លងទៅនេះ សប្បុរសជនដែលបានចូលរួមជាថវិកាសម្រាប់ប្រយុទ្ធជាមួយជម្ងឺកូវីត១៩ មានចំនួនទឹកប្រាក់ចំនួន ១៣ ៥៩៧ ២៩៥ដុល្លារ ដោយមិនទាន់គិតពីជំនួយជាសំភារះបរិក្ខា ដូចជាម៉ាស់ អាកុល សាប៊ូសំភារៈពេទ្យជាដើម ដែលមានតម្លៃរាប់លានដុល្លារថែមទៀត។ដោយឡែកការរួមវិភាគទានតាមរយៈការបរិច្ចាគបៀវត្សទាំងស្រុងឬមួយផ្នែក នៃមន្ត្រីពីគ្រប់ស្ថាបន័ថ្នាក់ជាតិ ថ្នាក់ក្រោមជាតិនិងកងកម្លាំងប្រដាប់អាវុធគ្រប់ប្រភេទគិតត្រឹមព្រឹកថ្ងៃ ១៦ មេសា ២០២០ នេះ មានចំនួន ១៤ ៧៥១នាក់ និងនៅសល់មួយចំនួនទៀត ដែលកំពុងផ្ទៀងផ្ទាត់ នៅក្រសួងមុខងារសារធារណៈ។
