កិច្ចប្រជុំកំពូលអាស៊ានលើកទី ៤២ ដែលមានឥណ្ឌូណេស៊ីធ្វើជាម្ចាស់ផ្ទះ កំពុងប្រព្រឹត្តទៅពីថ្ងៃទី ១០ ដល់ទី ១១ ឧសភានេះ ជាមួយនឹងការផ្ដោតសំខាន់លើប្រធានបទធំៗចំនួន ៣។ នេះបើតាមការចុះផ្សាយពី CGTN។
ប្រធានបទដែលនឹងលើកយកមកជជែកគ្នានោះគឺ ទីមួយ កំណត់ទីតាំងអាស៊ានជាមជ្ឈមណ្ឌលសំខាន់នៃការអភិវឌ្ឍន៍ក្នុងតំបន់ និងពិភពលោក ទីពីរ ធ្វើឱ្យអាស៊ានក្លាយជាតំបន់សេដ្ឋកិច្ចដែលរីកចម្រើនយ៉ាងឆាប់រហ័ស រួមបញ្ចូល និងនិរន្តរភាពក្នុងរយៈពេលវែង និងចុងក្រោយគឺ ស្វែងរកការធ្វើឱ្យឥណ្ឌូប៉ាស៊ីហ្វិកក្លាយជាតំបន់សន្តិភាព និងវិបុលភាព តាមរយៈកិច្ចសហប្រតិបត្តិការគ្រប់ជ្រុងជ្រោយ។
គំនិតផ្តួចផ្តើមសំខាន់ៗមួយចំនួនឆ្ពោះទៅរកការសម្រេចបាននូវគោលដៅប្រធានបទទាំងនេះ រួមមានការពិភាក្សាអំពីសន្ធិសញ្ញាតំបន់គ្មានអាវុធនុយក្លេអ៊ែរនៅអាស៊ីអាគ្នេយ៍ (SEANWFZ) ការជួញដូរជាមួយរូបិយប័ណ្ណក្នុងស្រុក ការពង្រឹងកិច្ចសហប្រតិបត្តិការផ្នែកសុខភាព ការបង្កើនសន្តិសុខស្បៀងអាហារ និងថាមពល ការបង្កើតប្រព័ន្ធអេកូឡូស៊ីសម្រាប់យានជំនិះអគ្គិសនីជាដើម។
អាស៊ីអាគ្នេយ៍គឺជាតំបន់សំខាន់មួយក្នុងពិភពលោក ដែលនយោបាយ និងសេដ្ឋកិច្ចអន្តរជាតិមានការព្រួយបារម្ភ មិនតិចទេ ព្រោះវាជាមជ្ឈមណ្ឌលនៃផលិតកម្មពិភពលោក រួមជាមួយនឹងអាស៊ីបូព៌ា។
សហរដ្ឋអាមេរិក ធ្លាប់ប៉ុនប៉ងពង្រឹងទំនាក់ទំនងជាមួយអាស៊ាន ដើម្បីរារាំងការពង្រីកខ្លួនរបស់ចិន ប៉ុន្តែមិនបានប្រយោជន៍ ដ្បិតចិនគឺជាដៃគូសហការដ៏ធំបំផុតរបស់សមាគមប្រជាជាតិអាស៊ីអាគ្នេយ៍។
ចំពោះដំណើរស្វែងរកដើម្បីសម្រេចបាននូវគោលដៅប្រធានបទទាំងបីនេះ ត្រូវតែគិតឡើងវិញជាមួយនឹងការពិតដែលថា សមាជិកអាស៊ានត្រូវធ្វើការជាមួយគ្នាយ៉ាងជិតស្និទ្ធ ដូច្នេះសមាហរណកម្មសេដ្ឋកិច្ចកាន់តែធំ ក្នុងចំណោមប្រទេសសមាជិកអាស៊ាន អាចធ្វើឱ្យមានកំណើនសេដ្ឋកិច្ចកាន់តែលឿន ដែលនាំឱ្យអាស៊ានឈានទៅមុខបន្ថែមទៀតតាមគន្លងនៃការក្លាយជាមជ្ឈមណ្ឌលនៃការអភិវឌ្ឍន៍ក្នុងតំបន់ និងពិភពលោក។
ដូចគ្នាដែរ កិច្ចសហប្រតិបត្តិការរវាងប្រទេស ដែលចាំបាច់ត្រូវពង្រឹងសន្តិភាព និងវិបុលភាពក្នុងតំបន់ អាចអនុញ្ញាតឱ្យមានកំណើនសេដ្ឋកិច្ចលឿនជាងមុន និងសមាហរណកម្មកាន់តែច្រើនក្នុងចំណោមប្រទេសសមាជិកអាស៊ាន៕
