ក្រុមហ៊ុនអេឡិចត្រូនិកខ្នាតយក្សតៃវ៉ាន់ Foxconn ថ្មីៗនេះ បាននិយាយថា ខ្លួនបានធ្វើការទិញយកដីដ៏ធំមួយកន្លែង នៅជាយនៃមជ្ឈមណ្ឌលបច្ចេកវិទ្យា Bengaluru របស់ប្រទេសឥណ្ឌា នៅពេលក្រុមហ៊ុនដែលអ្នកផ្គត់ផ្គង់ដ៏សំខាន់បំផុតរបស់ Apple មួយនេះ កំពុងរៀបចំផែនការ ដើម្បីងាកចេញឆ្ងាយពីប្រទេសចិន។
គួរឱ្យដឹងផងដែរថាទាំង Foxconn និង Apple សុទ្ធសឹងតែកំពុងព្យាយាមធ្វើផ្លាស់ប្តូរទីតាំងផលិតកម្មរបស់ខ្លួន ចេញឆ្ងាយពីប្រទេសចិន បន្ទាប់ពីទទួលរងផលប៉ះពាល់យ៉ាងខ្លាំង ពីគោលនយោបាយទប់ស្កាត់ជំងឺកូវីដ-១៩ ដ៏តឹងរ៉ឹងបំផុត ក្នុងរយ:ពេលប៉ុន្មានឆ្នាំថ្មីៗនេះ រួមទាំងភាពតានតឹងកាន់តែខ្លាំងឡើង រវាងរដ្ឋាភិបាលទីក្រុងប៉េកាំង និងសហរដ្ឋអាមេរិកផងដែរ ។
យ៉ាងណាមិញ ដីមួយកន្លែងដែលក្រុមហ៊ុន Foxconn បានធ្វើការទិញយកនេះ មានទំហំរហូតដល់ ១,២ លានម៉ែត្រការ៉េ ដែលស្ថិតនៅក្នុងមជ្ឈមណ្ឌលបច្ចេកវិទ្យាឥណ្ឌា Bengaluru រដ្ឋ Karnataka ដោយបានចំណាយទឹកប្រាក់ប្រមាណ ៣ពាន់លានរូពី (៣៧លានដុល្លារ) ។
លើសពីនេះ បើតាមការបញ្ជាក់ពីប្រមុខរដ្ឋ Karnataka លោក Basavaraj S. Bommai បាននិយាយថា ក្រុមហ៊ុន Apple នឹងពន្លឿនការវិនិយោគរបស់ខ្លួនឱ្យចាប់រហ័សតាមដែលអាចធ្វើទៅបាន ដើម្បីផលិតទូរស័ព្ទ iPhone នៅក្នុងរោងចក្រថ្មី ក្នុងរដ្ឋនេះ ដោយនឹងអាចបង្កើតការងារថ្មីៗ សម្រាប់ប្រជាជនឥណ្ឌា បានប្រហែល ១០០ ០០០ នាក់ ។
ជម្រាបជូនផងដែរថា ក្រៅតែពីប្រទេសឥណ្ឌា ក្រុមហ៊ុន Foxconn ក៏កំពុងទទួលបានសិទ្ធិប្រើប្រាស់ដី នៅក្នុងទំហំ ៤៨០ ០០០ ម៉ែត្រការ៉េ នៅក្នុងខេត្ត Nghe An ប្រទេសវៀតណាម ផងដែរ ៕
