ប្រទេសចិន នឹងបញ្ជូនបេសកជនពិសេសម្នាក់ទៅបំពេញទស្សនកិច្ចនៅប្រទេសអ៊ុយក្រែន រុស្ស៊ី និងបណ្ដាប្រទេសនៅតំបន់អឺរ៉ុបមួយចំនួន ពីថ្ងៃច័ន្ទទី ១៥ ឧសភា ខណៈនេះគឺជាការបញ្ជូនរដ្ឋមន្ត្រីជាន់ខ្ពស់របស់ចិន សម្រាប់ដំណើរទស្សនកិច្ចទៅប្រទេសកំពុងមានសង្គ្រាមមួយនេះជាលើកដំបូង។
រយៈពេលប៉ុន្មានខែចុងក្រោយនេះ ចិនបានតាំងខ្លួនជាអ្នកសម្របសម្រួលដោះស្រាយបញ្ហាពិភពលោក ប៉ុន្តែទន្ទឹមនឹងនោះមហាអំណាចសេដ្ឋកិច្ចទី ២ ត្រូវរងការរិះគន់ ដោយសារបដិសេធមិនព្រមដាក់ទណ្ឌកម្មសេដ្ឋកិច្ចទៅលើរុស្ស៊ី។
ដោយឡែក បេសកជនពិសេសដែលនឹងធ្វើដំណើរទៅអ៊ុយក្រែននោះគឺលោក Li Hui អតីតឯកអគ្គរដ្ឋទូតចិនប្រចាំនៅរុស្ស៊ីពីឆ្នាំ ២០០៩ ដល់ ២០១៩ ដោយនឹងដឹកនាំគណៈប្រតិភូអបដំណើរជាមួយផង។ នេះបើតាមការចុះផ្សាយពី CNA។
ចំពោះដំណើរទស្សនកិច្ចមួយនេះ អ្នកនាំពាក្យក្រសួងការបរទេស Wang Wenbin ក៏បង្ហើបដែរថា លោក Li នឹងត្រូវធ្វើដំណើរទៅកាន់ប្រទេសអ៊ុយក្រែន ប៉ូឡូញ បារាំង អាល្លឺម៉ង់ និងរុស្ស៊ី ដើម្បីទំនាក់ទំនងជាមួយគ្រប់ភាគី លើដំណោះស្រាយនយោបាយនៃវិបត្តិអ៊ុយក្រែន៕
