ទំនាក់ទំនងរវាងប្រទេសរុស្ស៊ី ជាមួយចិន បានកើនឡើងដល់ចំណុចកំពូលថ្មីមួយផ្សេងទៀត បើទោះបីជាពេលបច្ចុប្បន្ននេះ ប្រទេសទាំងពីរកំពុងមានភាពល្អក់កករខ្លាំង ជាមួយបណ្តាប្រទេសលោកខាងលិច ជុំវិញបញ្ហាសង្គ្រាមនៅអ៊ុយក្រែនដ៏ដោយ។
បើតាមការចុះផ្សាយពីសារព័ត៌មាន Reuters បានបង្ហាញថា នាយរដ្ឋមន្ត្រីរុស្ស៊ី លោក Mikhail Mishustin កាលពីថ្ងៃពុធកន្លងទៅ បានចុះហត្ថលេខាលើកិច្ចព្រមព្រៀងមួយ នៅក្នុងទីក្រុងប៉េកាំង ស្តីពីកិច្ចសហប្រតិបត្តិការវិនិយោគនៅក្នុងវិស័យពាណិជ្ជកម្ម ការនាំចេញផលិតផលកសិកម្ម និងច្រើនទៀត ។
គួរឱ្យដឹងថា លោក Mishustin បានធ្វើដំណើរទៅទស្សនកិច្ចនៅក្នុងប្រទេសចិនជាលើកដំបូង ចាប់តាំងពីរដ្ឋាភិបាលទីក្រុងមូស្គូ បានបើកការឈ្លានពានរបស់ខ្លួន ដោយបញ្ជូនកងកម្លាំងរាប់ពាន់នាក់ទៅកាន់ប្រទេសអ៊ុយក្រែន នៅក្នុងខែកុម្ភ:ឆ្នាំ ២០២២ កន្លងទៅ ហើយសម្រាប់ការធ្វើដំណើរទៅកាន់ប្រទេសចិននេះ នាយករដ្ឋមន្ត្រីរុស្ស៊ី បានជួបពិភាក្សាជាមួយនាយករដ្ឋមន្ត្រីរបស់ចិន លោក Li Qiang ហើយក៏គ្រោងនឹងបន្តជួបជាមួយប្រធានាធិបតី លោក Xi Jinping ផងដែរ ។
មិនតែប៉ុណ្ណោះ អំឡុងកិច្ចពិភាក្សានេះ លោក Mishustin បានធ្វើការពណ៌នាអំពីទំនាក់ទំនងទេ្វភាគីថា បានឈានដល់កម្រិតខ្ពស់មិនធ្លាប់មានពីមុនមក បើទោះបីជាបណ្តាប្រទេសលោកខាងលិច មិនពេញចិត្តចំពោះទំនាក់ទំនងរបស់ពួកគេក៏ដោយ ។
យ៉ាងណាមិញ ជាមួយនឹងសង្គ្រាមនៅអ៊ុយក្រែន នៅតែបន្តអូសន្លាយ រុស្ស៊ីមានអារម្មណ៍ថាការដាក់ទណ្ឌកម្មពីសំណាក់ប្រទេសលោកខាងលិច ហាក់កាន់តែធ្វើឱ្យរដ្ឋាភិបាលទីក្រុងមូស្គូ ងាកមកផ្តោតលើការពឹងផ្អែកបន្ថែមទៀត ទៅលើរដ្ឋាភិបាលទីក្រុងប៉េកាំង សម្រាប់ការគាំទ្រជាច្រើន ជាជាងដែលចិន ត្រូវការប្រេង និងឧស្ម័ន ពីប្រទេសរបស់ខ្លួន ។
ជម្រាបជូនផងដែរថា អនុស្សរណ:នៃការយោគយល់គ្នា (MoU) ដែលត្រូវបានចុះហត្ថលេខា អំឡុងជំនួបរវាងភាគីប្រទេសទាំងពីរនោះ មានដូចជា កិច្ចព្រមព្រៀងដើម្បីពង្រឹងកិច្ចសហប្រតិបត្តិការវិនិយោគលើសេវាពាណិជ្ជកម្ម កិច្ចព្រមព្រៀងស្តីពីការនាំចេញផលិតផលកសិកម្មទៅកាន់ប្រទេសចិន និងកិច្ចព្រមព្រៀងមួយទៀត ស្តីពីកិច្ចសហប្រតិបត្តិការកីឡា ផងដែរ ៕
