សហរដ្ឋអាមេរិកបានប្រកាសពីគម្រោងផ្ដល់ជំនួយបន្ថែមដល់ប្រទេសអ៊ុយក្រែន ជាសព្វាវុធដែលភាគច្រើនជាគ្រប់កាំភ្លើងតែម្ដង សរុបជាទឹកប្រាក់ប្រហែល ៣០០លានដុល្លារ។ នេះបើតាមប្រភពផ្លូវការពីរបាននិយាយកាលពីថ្ងៃព្រហស្បតិ៍។
ដោយឡែក សារព័ត៌មាន Kelo ក៏បានបន្ថែមទៀតថា កញ្ចប់ជំនួយនេះត្រូវបានគេរំពឹងថា នឹងមានគ្រាប់រ៉ុក្កែតជាច្រើន សម្រាប់ប្រើប្រាស់ជាមួយម៉ាស៊ីនបាញ់គ្រាប់រ៉ុក្កែត HIMARS និងគ្រាប់រំសេវសម្រាប់ការពារអ៊ុយក្រែនប្រឆាំងនឹងរុស្ស៊ី។
កញ្ចប់ជំនួយនេះទៀតសោត នឹងត្រូវផ្គត់ផ្គង់ដោយប្រើអំណាចផ្ដាច់មុខរបស់ប្រធានាធិបតី ឬហៅកាត់ថា PDA ដែលប្រធានាធិបតីអាចប្រើអំណាចផ្ទេរសេវាកម្មណាមួយពីស្តុកអាមេរិក ដោយមិនត្រូវការសេចក្ដីសម្រេចពីសភា ក្នុងករណីមានអាសន្នណាមួយ។
សូមជម្រាបដែរថា សហរដ្ឋអាមេរិកបានសន្យាផ្តល់ជំនួយសន្តិសុខជាង ៣៥ពាន់លានដុល្លារដល់អ៊ុយក្រែន ចាប់តាំងពីថ្ងៃទី ២៤ ខែកុម្ភៈឆ្នាំ ២០២២ បន្ទាប់ពីមានការឈ្លានពានដោយកងកម្លាំងរុស្ស៊ី៕
