រយៈពេល ១ឆ្នាំកន្លះមកនេះ ស្ថាបនិកក្រុមហ៊ុន Meta Platforms មិនដែលមានវត្តមានក្នុងបញ្ជីឈ្មោះមហាសេដ្ឋីមានបំផុតលើលោកទាំង ១០ រូបឡើយ ពោលតាំងពីខែមករាឆ្នាំមុនម៉្លេះ។
យោងតាមការចុះផ្សាយពី Forbes បានបង្ហាញឲ្យដឹងថា ទ្រព្យសម្បត្តិរបស់ Mark Zuckerberg បានកើនឡើងដល់ ១០០ពាន់លានដុល្លារជាលើកដំបូង តាំងពីខែកុម្ភៈឆ្នាំ ២០២២ ដោយសារតម្លៃហ៊ុនរបស់ Meta កើនឡើងប្រហែល ៣% កាលពីថ្ងៃទី ១៥ មិថុនា។
ប៉ុន្តែគិតត្រឹមថ្ងៃទី ១៧ មិថុនានេះ ទ្រព្យសម្បត្តិរបស់ Mark បានធ្លាក់មកនៅត្រឹម ៩៩,៧ពាន់លានដុល្លារ តែវាក៏នៅតែអាចជួយឲ្យមេធំរបស់ Facebook អាចឡើងមកដល់តំណែង Top 10 ជាអ្នកមានដាច់គេលើលោកបានដដែល។
សូមជម្រាបដែរថា បើទោះជាបច្ចុប្បន្ន Mark Zuckerberg បានក្លាយជាមហាសេដ្ឋីមានបំផុតទី ១០ ក៏ពិតមែន ប៉ុន្តែទំហំទ្រព្យសម្បត្តិរបស់លោកគឺនៅឆ្ងាយ ពីអ្វីដែលលោកធ្លាប់បានមានលើសលប់រហូតដល់ជាង ១៣៦ពាន់លានដុល្លារ កាលពីខែកញ្ញាឆ្នាំ ២០២១៕
