ប្រមុខការទូតអាមេរិក លោក Antony Blinken ទើបនឹងបញ្ចប់ដំណើរទស្សនកិច្ចទៅកាន់ទីក្រុងប៉េកាំង ដោយទទួលបានសមិទ្ធផលដ៏ធំមួយ គឺជួបពិភាក្សាដោយផ្ទាល់ជាមួយប្រធានាធិបតីចិន ស៊ី ជិនពីង ក្នុងគោលបំណងផ្សះផ្សារទំនាក់ទំនងរវាងអាមេរិក និងចិន។
ប៉ុន្តែការខិតខំប្រឹងប្រែងរបស់រដ្ឋមន្ត្រីការបរទេសអាមេរិក លោក Blinken អាចនឹងមិនសូវទទួលបានផ្លែផ្កា ក្រោយប្រធានាធិបតីអាមេរិក ចូ បៃដិន បានហៅមេដឹកនាំកំពូលចិនថាជាជនផ្ដាច់ការ។
យោងតាមការចុះផ្សាយពីសារព័ត៌មាន BBC បានបង្ហាញថា លោក ចូ បៃដិន បាននិយាយថា លោក ស៊ី មានការខ្មាសអៀនជុំវិញបញ្ហាបាឡុងចារកម្ម ដែលលោកបានបាញ់ទម្លាក់កាលពីប៉ុន្មានខែមុន ហើយបានហៅទង្វើនេះថាជា ទង្វើជនផ្ដាច់ការ។
“មូលហេតុដែលលោក ស៊ី មានការអាក់អន់ស្រពន់ចិត្ត គឺដោយសារគាត់មិនដឹងទេថា ពេលខ្ញុំបាញ់បាឡុងនោះ គឺមានឧបករណ៍ចារកម្មដល់ទៅ ២ ប្រអប់ធំៗ។ វាគឺជារឿងគួរឲ្យខ្មាសខ្លាំងបំផុត សម្រាប់ជនផ្ដាច់ការ នៅពេលពួកគេមិនដឹងថា មានរឿងអ្វីកើតឡើង”។ នេះបើតាមសម្ដីរបស់ប្រធានាធិបតីអាមេរិក បាននិយាយនៅកម្មវិធីរៃអង្គាសប្រាក់មួយ។
សូមជម្រាបដែរថា មហាអំណាចសេដ្ឋកិច្ចទាំង ២ គឺបានពាក់មុខយក្សដាក់គ្នាអស់រយៈពេលជាយូរណាស់មកហើយ តាំងពីជម្លោះបញ្ហាពាណិជ្ជកម្ម សិទ្ធមនុស្ស និងបញ្ហានៅកោះតៃវ៉ាន់ ប៉ុន្តែជម្លោះមួយនេះផ្ទុះកាន់តែខ្លាំង ក្រោយអាមេរិកចោទចិនថា បង្ហោះបាឡុងចារកម្មចូលដែនអាកាសរបស់ខ្លួន ស្របពេលភាគីម្ខាងទៀតប្រកែកដាច់អហង្ការថា អាមេរិកចោទពួកគេដោយគ្មានភ័ស្តុតាង៕
