រដ្ឋសភាថៃកំពុងបើកកិច្ចប្រជុំ និងការតស៊ូមតិរវាងសមាជិកសភា ក្នុងការសម្រេចជ្រើសរើសនាយករដ្ឋមន្ត្រីថ្មីនាថ្ងៃនេះ ខណៈការតស៊ូមតិនោះ គឺប្រធានសភាលោក Wan Muhamad Noor Matha ទុកពេលឲ្យ ៦ម៉ោង ពោលលទ្ធផលសម្រេចចុងក្រោយអាចនឹងប្រកាសនារសៀលថ្ងៃនេះ។
យ៉ាងណា បេក្ខភាពដែលលេចធ្លោរ និងទទួលបានភាគរយខ្ពស់ក្នុងការក្លាយជានាយករដ្ឋមន្ត្រីថៃគឺមេគណបក្សឆ្ពោះទៅមុខ (MFP) លោក ភីថា លីមចារើនរ៉ាត់ ក្រោយទទួលបានសម្លេងគាំទ្រច្រើនបំផុត សម្រាប់ការបោះឆ្នោតសកលកាលពីខែឧសភា។
ប៉ុន្តែមិនមែនមានន័យថា លោកភីថា នឹងក្លាយជានាយករដ្ឋមន្ត្រី ១០០%ឡើយ ដ្បិតបច្ចុប្បន្នលោកកំពុងផុងខ្លួន ជាមួយនឹងការចោទប្រកាន់ធំៗចំនួន ២ ដែលអាចធ្វើឲ្យលោកមិនមានលក្ខណៈសម្បត្តិគ្រប់គ្រាន់ សម្រាប់ដឹកនាំប្រទេសថៃ។ នេះបើតាមការចុះផ្សាយពី CNN។
រឿងក្ដីទីមួយនោះគឺ កេរ្តិ៍មរតកឪពុកដែលបានបន្សល់ទុក ដែលជាភាគហ៊ុននៃក្រុមហ៊ុនប្រព័ន្ធផ្សព្វផ្សាយ ដែលខុសពីច្បាប់ដែលបានចែងដោយរដ្ឋធម្មនុញ្ញថា គ្រប់បេក្ខភាពនាយករដ្ឋមន្ត្រីទាំងអស់ មិនអនុញ្ញាតិឲ្យមានភាគហ៊ុននៅក្នុងក្រុមហ៊ុនប្រព័ន្ធផ្សព្វផ្សាយ ហើយទាមទារឲ្យលោកដកហូតសិទ្ធជាបេក្ខភាពនាយករដ្ឋមន្ត្រី ប៉ុន្តែលោកភីថា បានប្រកែកដាច់អហង្ការ និងសំណូមពរឲ្យគណៈកម្មការរៀបចំការបោះឆ្នោត (EC) បញ្ជូនសំណុំរឿងនេះទៅតុលាការ។
រីឯរឿងធំមួយទៀតគឺ EC ចោទប្រកាន់លោកមេបក្សឆ្ពោះទៅមុខទៅថា បានរំលោភបំពានច្បាប់ឃោសនាបោះឆ្នោត ហើយទាមទារឲ្យព្យួរឈ្មោះរបស់លោកភីថា ក្នុងនាមជាសមាជិកសភា និងបញ្ជូនសំណុំរឿងទៅតុលាការរដ្ឋធម្មនុញ្ញ ខណៈសំណុំរឿងនេះនឹងត្រូវត្រួតពិនិត្យនាសប្ដាហ៍ក្រោយ ហើយបើសិនជារកឃើញថា លោកពិតជាល្មើសមែន លោកនឹងត្រូវផ្អាកពីកាតព្វកិច្ចនយោបាយ បើទោះជាលោកជាប់ជានាយករដ្ឋមន្ត្រីក្ដី។
