ចិន នឹងដំណើរការទិដ្ឋាការដោយសេរី សម្រាប់ពលរដ្ឋសិង្ហបុរី និងព្រុយណេ ឡើងវិញ ក្រោយផ្អាកជាង ៣ ឆ្នាំ

ថ្មីៗនេះ រដ្ឋាភិបាលចិន បានប្រកាសថា នឹងដាក់ឱ្យដំណើរការឡើងវិញ នូវទិដ្ឋាការដោយសេរីរយ:ពេល ១៥ ថ្ងៃ សម្រាប់ពលរដ្ឋសិង្ហបុរី និងព្រុយណេ ចូលមកកាន់ប្រទេសរបស់ខ្លួន ដោយនឹងត្រូវអនុវត្តចាប់ពីថ្ងៃទី ២៦ ខែកក្កដា តទៅ បន្ទាប់ពីត្រូវបានផ្អាកអស់រយ:ពេលជាង ៣ ឆ្នាំ ដោយសារតែជំងឺកូវីដ-១៩ ។

យោងតាមការជូនដំណឹងរបស់ស្ថានទូតចិន ប្រចាំប្រទេសនៅក្នុងតំបន់អាស៊ីអាគ្នេយ៍ទាំងពីរនេះ បានបង្ហាញថា ការធ្វើដំណើរចូលមកកាន់ប្រទេសចិន ដោយពុំចាំបាច់មានទិដ្ឋាការនេះ នឹងផ្តល់ជូនសម្រាប់ប្រជាជនសិង្ហបុរី និងព្រុយណេ ដែលមានបំណងធ្វើដំណើរសម្រាប់ធ្វើអាជីវកម្ម ទស្សនាកម្សាន្ត សួរសុខទុក្ខសាច់ញាតិ មិត្តភក្តិ និងឆ្លងកាត់ប្រទេសចិន ។

គួរឱ្យដឹងផងដែរថា ក្រោមគោលនយោបាយ គ្មានកូវីដ ប្រទេសចិន ធ្លាប់បានដាក់កំហិតយ៉ាងតឹងរ៉ឹងបំផុត ចំពោះការធ្វើដំណើរ លើភ្ញៀវទេសចរអន្តរជាតិ ចាប់ពីថ្ងៃទី ២៨ ខែមីនា ឆ្នាំ ២០២០ មក ដើម្បីការពារការរីករាលដាលកាន់តែខ្លាំង នៃជំងឺរាតត្បាតនេះ។

ប៉ុន្តែទោះជាយ៉ាងណាក៏ដោយ រដ្ឋាភិបាលចិន បានសម្រេចដកវិធានការកូវីដស្មើសូន្យរបស់ខ្លួន ជាច្រើនឡើងវិញ នៅក្នុងខែធ្នូកាលពីឆ្នាំមុន ប៉ុន្តែទើបតែនឹងចាប់ផ្តើមដាក់ឱ្យដំណើរការទិដ្ឋាការទេសចរណ៍ម្តងទៀត នៅក្នុងខែមីនា ឆ្នាំ ២០២៣ កន្លងទៅ ។

ជម្រាបជូនផងដែរថា ប្រទេសចិន បច្ចុប្បន្នក៏កំពុងស្វែងរកការធ្វើដំណើរដោយគ្មានទិដ្ឋាការសម្រាប់ពលរដ្ឋរបស់ខ្លួន ទៅកាន់ប្រទេសសិង្ហបុរី វិញផងដែរ ៕