ក្រោយចែកផ្លូវគ្នា គណបក្សឆ្ពោះទៅមុខ ប្រកាសមិនគាំទ្របេក្ខភាពនាយករដ្ឋមន្ត្រីរបស់គណបក្សភឿថៃ

កាលពីថ្ងៃទី ១៥ ខែសីហាកន្លងទៅ គណបក្សទទួលបានសម្លេងគាំទ្រច្រើនបំផុត សម្រាប់ការបោះឆ្នោតសកលកាលពីថ្ងៃទី ១៤ ខែឧសភា គឺគណបក្សឆ្ពោះទៅមុខ (MFP) បានប្រកាសច្បាស់ៗថា ពួកគេនឹងមិនគាំទ្របេក្ខភាពនាយករដ្ឋមន្ត្រី លោក Srettha Thavisin ដែលតំណាងឲ្យគណបក្សភឿថៃឡើយ។ នេះបើតាមការចុះផ្សាយពីកាសែត Bangkokpost។

សេចក្ដីប្រកាសមួយនេះធ្វើឡើង ក្រោយមេបក្ស ភីថា លីមចារើនរ៉ាត់ បរាជ័យច្រើនសារ ក្នុងការ​ក្លាយជានាយករដ្ឋមន្ត្រីថៃ បើទោះជាមានការបង្កើតគណបក្សចម្រុះ ប៉ុន្តែក្រោយមក​គណបក្សឆ្ពោះទៅមុខ ក៏បានប្រកាសចែកផ្លូវគ្នាជាមួយគណបក្សភឿថៃ។

សេចក្ដីសម្រេចរបស់គណបក្សឆ្ពោះទៅមុខ អាចធ្វើឲ្យគណបក្សភឿថៃបញ្ហារាំងស្ទះ ក្នុងការបង្កើតរដ្ឋាភិបាលថ្មី ប៉ុន្តែមេបក្សភឿថៃមួយរូបគឺ លោកបណ្ឌិត Cholnan Srikaew បាន​អះអាងថា ការសម្រេចចិត្តរបស់គណបក្សឆ្ពោះទៅមុខ មិនមែនជារឿងភ្ញាក់ផ្អើលឡើយ ហើយគណបក្សរបស់លោកក៏គោរពតាមការយល់ឃើញរបស់ពួកគេដូចគ្នា។

សូមជម្រាបដែរថា បន្ទាប់ពីបរាជ័យក្នុងការឈរឈ្មោះជាបេក្ខភាពនាយករដ្ឋមន្ត្រីថៃម្ដងទៀត លោក ភីថា លីមចារើនរ៉ាត់ ក៏សម្រេចរំសាយគណបក្សចម្រុះ ហើយគណបក្សភឿថៃ ក៏ប្រកាស​បង្កើតគណបក្សចម្រុះថ្មី ដោយចាត់តាំងអ្នកជំនួញថៃ Srettha Thavisin ជាបេក្ខភាពនាយករដ្ឋមន្ត្រី។

ទន្ទឹមនឹងនោះក៏មានប្រភពផ្សេងៗរាយការណ៍ថា គណបក្សភឿថៃកំពុងព្យាយាមស្វែងរក​ការគាំទ្រពីគណបក្សគាំទ្រដោយយោធាថៃគឺ គណបក្ស Pralang Pracharath ដឹកនាំដោយឧត្តមសេនីយ Prawit Wongsuwon និងគណបក្សថៃរួបរួមជាតិ​ផងដែរ៕