កូនស្រីពៅលោក ថាក់ស៊ីន បញ្ជាក់ជាថ្មីចំពោះថ្ងៃដែលឪពុកខ្លួននឹងវិលចូលស្រុកកំណើតវិញ

លោកស្រី Paetongtarrn Shinawatra បានធ្វើការប្រកាសសារជាថ្មី នៅលើបណ្តាញសង្គមនៅថ្ងៃសៅរ៍នេះថា អតីតនាយករដ្ឋមន្ត្រីថៃ និងជាឪពុករបស់ខ្លួន គឺលោក ថាក់ស៊ីន ស៊ីណាវ៉ាត្រា នឹងត្រឡប់មកកាន់ប្រទេសកំណើតវិញ នៅថ្ងៃអង្គារសប្តាហ៍ក្រោយ។

តាមរយ:ការចុះផ្សាយពីកាសែត Bangkok Post បានបង្ហាញទៀតថា លោកស្រី Paetongtarn ដែលជាបេក្ខភាពមួយក្នុងចំណោមបេក្ខភាពនាយករដ្ឋមន្ត្រីផ្សេងទៀតរបស់គណបក្សភឿថៃ បានសរសេរ នៅលើគណនី Instagram និង X (Twitter) របស់លោកស្រីថា ៖ ” នៅថ្ងៃអង្គារ ទី ២២ ខែសីហា វេលាម៉ោង ៩ ព្រឹក ខ្ញុំនឹងរង់ចាំនៅប្រលានយន្តហោះ Don Muang ដើម្បីស្វាគមន៍ឪពុកខ្ញុំ លោក ថាក់ស៊ីន ” ។

លោកស្រី Paetongtarn ក៏បានបញ្ជាក់ទៀតផងដែរថា គម្រោងក្នុងការវិលត្រលប់មកកាន់ប្រទេសកំណើតវិញរបស់ឪពុកលោកស្រី មិនត្រូវបានលុបចោលនោះឡើយ ដោយគ្រាន់តែបានពន្យាពេលប៉ុណ្ណោះ ហើយចំពោះអ្វីដែលលោកស្រីធ្លាប់បានលើកឡើងកាលពីមុន គឺមិនមែនលោកស្រី ចេះតែនិយាយដោយគ្មានហេតុផលនោះឡើយ ដោយសារតែគ្រូពេទ្យចង់ឱ្យឪពុកលោកស្រី ពិនិត្យសុខភាពសិន មុនពេលវិលត្រលប់ចូលស្រុកវិញ។​

ជម្រាបជូនផងដែរថា នៅចំថ្ងៃខួបកំណើតគម្រប់ ៧៤ ឆ្នាំរបស់លោក ថាក់ស៊ីន កាលពីថ្ងៃទី ២៦ ខែកក្កដា លោកស្រី Paetongtarn បានប្រកាសថា ឪពុករបស់លោកស្រី នឹងមកដល់អាកាសយានដ្ឋាន Don Muang នៅថ្ងៃទី ១០ ខែសីហា ប៉ុន្តែអ្នកសង្កេតការណ៍នយោបាយ ដែលរួមមានលោក Chuvit Kamolvisit និង Jatuporn Prompan ទទូចថាផែនការនៃការវិលត្រលប់មកស្រុកវិញរបស់លោក ថាក់ស៊ីន នេះ គឺគ្មានអ្វីក្រៅតែពីការសន្យាខ្យល់នោះឡើយ ខណ:ការលើកឡើងនេះ បានធ្វើឱ្យមានប្រតិកម្មពីសំណាក់លោកស្រី Paetongtarn និងថែមទាំងបានវាយបកទៅវិញថា ការអធិប្បាយរបស់លោក Chuvit គឺមិនសមហេតុផល ៕