នាយករដ្ឋមន្ត្រីអង់គ្លេស គ្រោងអញ្ជើញមហាសេដ្ឋីអាមេរិក ២រូប ចូលរួមកិច្ចប្រជុំនាចុងឆ្នាំនេះ

មហាសេដ្ឋីអាមេរិក Elon Musk ត្រូវបានអញ្ជើញចូលរួមកិច្ចប្រជុំកំពូលនៅទីក្រុងឡុដ៍ នាចុងឆ្នាំនេះ ពីសំណាក់នាយករដ្ឋមន្ត្រី Rishi Sunak បន្ទាប់ពីមហាសេដ្ឋីម្នាក់នេះ សម្រេចចិត្ត​វិនិយោគនៅបារាំង ជាជាងនៅអង់គ្លេស។

យោងតាមការចុះផ្សាយពីគេហទំព័រ Telegraph បានបង្ហាញថា លោក Sunak ចង់អញ្ជើញ​ស្ថាបនិកក្រុមហ៊ុន SpaceX រួមទាំងស្ថាបនិកក្រុមហ៊ុន Amazon ជាភ្ញៀវកិត្តិយសពិសេស ក្នុងកិច្ចប្រជុំ Global Investment ដែលគ្រោងរៀបចំធ្វើនៅខែវិច្ឆិកា ឆ្នាំនេះ។

ប្រភពដដែលបន្ថែមថា ការអញ្ជើញមហាសេដ្ឋីមានបំផុតប្រចាំអាមេរិកទាំង ២រូបនេះ គឺដើម្បីបង្ហាញពីសក្ដានុពល ដែលអង់គ្លេសកំពុងមាន ក៏ដូចជាចង់អូសទាញការវិនិយោគបន្ថែម​ពីធុរកិច្ចជន​កំពូលៗនានាទូទាំងពិភពលោកផងដែរ។

សូមជម្រាបដែរថា អ្នកនាំពាក្យក្រសួងពាណិជ្ជកម្ម បានបដិសេធមិនបញ្ជាក់ពីការអញ្ជើញ Elon Musk ឡើយ ប៉ុន្តែបាននិយាយថា CEO ប្រហែល ២០០នាក់ និង វិនិយោគិនលំដាប់ A ត្រូវបានទាក់ទង ដោយរដ្ឋាភិបាលផ្ទាល់ សម្រាប់កិច្ចប្រជុំ Global Investment នាឆ្នាំនេះ៕