កសិករថៃអាចនឹងពន្យារពេលសងបំណុល ៣ឆ្នាំ ជួយជំរុញកំណើនសេដ្ឋកិច្ចក្នុងស្រុក

គោលនយោបាយរបស់នាយករដ្ឋមន្ត្រីថៃថ្មី លោក Srettha Thavisin អាចនឹងឲ្យកសិករ​ពន្យារពេល​សងបំណុល ៣ឆ្នាំ ដើម្បីបង្កើនចំណូលបន្ថែម ក៏ដូចជាបង្កើនកំណើនសេដ្ឋកិច្ចជាតិ​ផងដែរ។

យោងតាមការចុះផ្សយពីសារព័ត៌មាន TheNation បានបង្ហាញថា គំនិតផ្ដួចផ្ដើមលើកកំពស់​វិស័យកសិកម្មរបស់លោក Srettha គឺធ្វើតាមរយៈការពន្យារពេលសងបំណុលនេះ ហើយកសិករ​អាចនឹងបង្កើនចំណូលជាមធ្យម ៣០ ០០០បាត​ក្នុងដីមួយរ៉ៃ រហូតដល់ឆ្នាំ២០២៧ ខណៈបច្ចុប្បន្ន​ប្រជាកសិករ​អាចទទួលបានចំណូលត្រឹម ១០ ០០០បាតប៉ុណ្ណោះ ពីការធ្វើកសិកម្ម​លើផ្ទៃដីមួយរ៉ៃ។

ជាមួយគ្នានោះ លោក Danucha Pichayanan អគ្គលេខាធិការក្រុមប្រឹក្សាអភិវឌ្ឍសេដ្ឋកិច្ច និងសង្គមជាតិ (NESDC) បានជួបសំណេះសំណាលជាមួយនាយករដ្ឋមន្ត្រី ដើម្បីរាយការណ៍​ពីស្ថានភាពបច្ចុប្បន្នក្នុងប្រទេស កាលពីថ្ងៃទី២៨ ខែសីហានេះ។

របាយការណ៍នោះបាននិយាយអំពីស្ថានភាពសេដ្ឋកិច្ច និងសង្គមក្នុងប្រទេសថៃ ទាំងបច្ចុប្បន្ន និងនិន្នាការនាពេលអនាគត ខណៈកាលពីត្រីមាសទី២ នៃឆ្នាំនេះ សេដ្ឋកិច្ចថៃបានកើនឡើងត្រឹមតែ ១,៨%ប៉ុណ្ណោះ ដែលធ្លាក់ចុះពីកំណើន ២,៦% នៅក្នុងត្រីមាសទីមួយ ស្របពេលឆមាសទីមួយនៃឆ្នាំនេះ សេដ្ឋកិច្ចថៃបានកើនឡើង ២,២%។

ទាក់ទងទៅនឹងទស្សនវិស័យសេដ្ឋកិច្ចថៃ សម្រាប់រយៈពេលនៅសល់នៃឆ្នាំនេះ NESDC បានរាយការណ៍ថា សេដ្ឋកិច្ចអាចនឹងកើនឡើងពី ២,៥ ដល់ ៣% គាំទ្រដោយកត្តាសំខាន់ៗដូចជា កំណើននៃការប្រើប្រាស់ឯកជន ការស្ទុះងើបឡើងវិញជាបន្តបន្ទាប់នៅក្នុងវិស័យទេសចរណ៍ និងការពង្រីកជាបន្តបន្ទាប់ នៃការវិនិយោគពីវិស័យឯកជន និងសាធារណៈ៕