យោងតាមការចុះផ្សាយពីសារព័ត៌មាន CNA បានបង្ហាញថា ការលក់រថយន្តទូទាំងពិភពលោក របស់ក្រុមហ៊ុនខ្នាតយក្ស Toyota Motor សម្រាប់ខែកក្កដា មានរហូតដល់ ៨៥៩ ៥០៦គ្រឿង ពោលកើនឡើង ៨% បើធៀបនឹងរយៈពេលដូចគ្នា កាលពីឆ្នាំទៅ។
ក្រុមហ៊ុនលក់រថយន្តបានច្រើនបំផុតលើលោកមួយនេះ ក៏បានរាយការណ៍ពីសន្ទុះផលិតកម្មនាខែកក្កដា ដែលកើនឡើងប្រមាណ ១៥% ទូទាំងសកលលោកថែមទៀត។
បន្ថែមពីនោះ ការលក់រថយន្តទូទាំងពិភពលោករបស់ក្រុមហ៊ុន Toyota សម្រាប់ឆមាសទីមួយ នៃឆ្នាំ២០២៣ នេះមានការកើនឡើងរហូតដល់ ៥,៤២លានគ្រឿង ពោលកើនប្រហែល ៥,៥% បើធៀបនឹងឆ្នាំទៅថែមទៀត។ នេះបើតាមរបាយការណ៍ពីគេហទំព័រផ្លូវការរបស់ក្រុមហ៊ុន Toyota។
សូមជម្រាបដែរថា ក្រុមហ៊ុនខ្នាតយក្សរបស់ជប៉ុនមួយនេះ បានចាប់ផ្ដើមដំណើការផលិតកម្មឡើងវិញនាថ្ងៃពុធ បន្ទាប់ពីផ្អាកការផលិតទាំងស្រុងកាលពីថ្ងៃអង្គារ ដោយសារបញ្ហាបច្ចេកទេសកុំព្យូទ័រ ដែលធ្វើឲ្យពួកគេមិនអាចបញ្ជាទិញគ្រឿងបន្លាស់រថយន្តបាន៕
