កាលពីថ្ងៃទី០៤ ខែកញ្ញា ប្រធានាធិបតីឥណ្ឌូណេស៊ី លោក ចូកូ វីដូដូ បានជួបជជែកគ្នាជាមួយនាយករដ្ឋមន្ត្រីវៀតណាម Pham Minh Chinh នៅសណ្ឋាគារ Merdeka Palace ទីក្រុងហ្សាកាតា ពីកិច្ចសហប្រតិបត្តិការលើវិស័យរថយន្តអគ្គិសនី។ នេះបើតាមការឲ្យដឹងពីលោកស្រី Retno Marsudi រដ្ឋមន្ត្រីក្រសួងការបរទេសឥណ្ឌូណេស៊ី។
ជាមួយគ្នានោះ សារព័ត៌មាន Tempo បានរាយការណ៍បន្ថែមថា ជំនួបរវាងប្រធានាធិបតី ចូកូ និងថ្នាក់ដឹកនាំវៀតណាម គឺជាការបើកផ្លូវឲ្យធុរកិច្ចជនឥណ្ឌូណេស៊ី អាចវិនិយោគនៅក្រុមហ៊ុនរថយន្តអគ្គិសនី VinFast បាន។
“ថ្នាក់ដឹកនាំទាំង២ បានស្វាគមន៍ចំពោះការអភិវឌ្ឍន៍ប្រព័ន្ធអេកូរថយន្តអគ្គិសនី ដោយវិស័យឯកជន និងជំរុញឱ្យមានកិច្ចសហប្រតិបត្តិការ SOE រវាងប្រទេសទាំងពីរ”។ នេះបើតាមការបញ្ជាក់ពីលោកស្រី Marsudi។
សូមជម្រាបដែរថា ឥណ្ឌូណេស៊ី និងវៀតណាម សុទ្ធសឹងតែជាមជ្ឈមណ្ឌលផលិតរថយន្តអគ្គិសនី ពេញនិយមបំផុតប្រចាំតំបន់អាស៊ាន តួយ៉ាងវៀតណាមមាន VinFast ខណៈឥណ្ឌូណេស៊ីមានធនធានធម្មជាតិរ៉ែនីកែលធំបំផុតលើលោក ដែលជាវត្ថុធាតុដើមសំខាន់បំផុតមួយ ក្នុងការផលិតអាគុយរថយន្ត៕
