ប្រធានាធិបតីរុស្ស៊ី លោក វ៉្លាឌីមៀ ពូទីន បានយល់ព្រមទទួលយកការអញ្ជើញធ្វើទស្សនកិច្ចនៅកូរ៉េខាងជើង ពីមេដឹកនាំ គីម ជុងអ៊ុន បន្ទាប់ពីមេដឹកនាំទាំង២ បញ្ចប់ការទទួលទានអាហារពេលល្ងាច រៀបចំឡើងដោយរដ្ឋាភិបាលរុស្ស៊ី កាលពីថ្ងៃទី១៣ ខែកញ្ញា។
យោងតាមការចុះផ្សាយពីកាសែតរដ្ឋ KCNA បានរាយការណ៍ថា លោក ពូទីន យល់ព្រមការអញ្ជើញពីលោក គីម ដោយក្ដីរីករាយ ប៉ុន្តែអ្នកនាំពាក្យវិមានក្រឹមឡាំង Dmitry Peskov បែរជាប្រាប់បណ្ដាញសារព័ត៌មានថា បច្ចុប្បន្នប្រធានាធិបតីរុស្ស៊ី មិនមានផែនការបំពេញទស្សនកិច្ចទៅទីក្រុងព្យុងយ៉ាងឡើយ។
រំលឹកបន្តិចថា កាលពីថ្ងៃទី១៣ ខែកញ្ញាម្សិលមិញ មេដឹកនាំប្រទេសទាំង២ បានជួបជជែកគ្នាទល់មុខ ជាលើកដំបូងក្នុងរយៈពេល ៤ឆ្នាំចុងក្រោយ ហើយគេគ្រាន់តែដឹងថា លោក គីម និងលោក ពូទីន ពិភាក្សាពីបញ្ហាសន្តិសុខ និងសន្តិភាពក្នុងតំបន់ ខណៈព័ត៌មានលំអិតផ្សេងៗ ត្រូវបានរក្សាការសំងាត់។
ជម្រាបបន្ថែមថា អំឡុងពេលកិច្ចប្រជុំជាមួយមេដឹកនាំរុស្ស៊ី លោកគីម បានអះអាងថា លោកនឹងគាំទ្រដោយគ្មានលក្ខខណ្ឌ សម្រាប់ការធ្វើសង្គ្រាមរវាងរុស្ស៊ី និងអ៊ុយក្រែន ដោយបានហៅវាថា ជាការប្រយុទ្ធដើម្បីការពារបូរណភាពទឹកដី ប្រឆាំងនឹងចក្រពត្តិនិយម និងលោកខាងលិច៕
