មេដឹកនាំកូរ៉េខាងជើង លោក គីម ជុងអ៊ុន បានបញ្ចប់ដំណើរទស្សនកិច្ច នៅប្រទេសរុស្ស៊ី កាលពីថ្ងៃអាទិត្យ ទី១៧ ខែកញ្ញា បន្ទាប់ពីបង្ហាញវត្តមានយ៉ាងកម្រនៅមហាអំណាចមួយនេះ រយៈពេល ៦ថ្ងៃ។ នេះបើតាមការចុះផ្សាយពីសារព័ត៌មាន CNA។
![](https://www.oknha.news/wp-content/uploads/2023/09/2288427-1024x682.jpg)
ប្រភពដដែលបន្ថែមថា លោក គីម បានបញ្ចប់ដំណើរទស្សនកិច្ច ជាមួយលទ្ធផលយ៉ាងល្អប្រសើរ ពោលរុស្ស៊ីយល់ព្រមជួយដល់ការអភិវឌ្ឍន៍ប្រព័ន្ធផ្កាយរណប និងបង្កើនទំនាក់ទំនងទ្វេភាគីជាមួយកូរ៉េខាងជើង ខណៈលោក គីម បានសម្ដែងការសាទរ និងសន្យាគាំទ្ររុស្ស៊ីដល់ទីបញ្ចប់។
បន្ថែមពីនោះ សម្ព័ន្ធមិត្តរុស្ស៊ី ក៏បានជូនអំណោយជាដ្រូនយ៉ាងច្រើនគ្រឿង ដល់មេដឹកនាំកូរ៉េខាងជើង មុនពេលលោក គីម វិលត្រឡប់ទៅផ្ទះវិញ ខណៈលោក វ៉្លាឌីមៀ ពូទីន បានយល់ព្រមទទួលការអញ្ជើញទៅបំពេញទស្សនកិច្ចនៅកូរ៉េខាងជើងវិញម្ដង និងសន្យាបញ្ជូនជនជាតិកូរ៉េខាងជើងម្នាក់ ទៅកាន់លំហអាកាសនាពេលខាងមុខថែមទៀត។
សូមជម្រាបដែរថា បើទោះជាលោក គីម ជុងអ៊ុន បានបំពេញទស្សនកិច្ចនៅរុស្ស៊ីរហូតដល់ ៦ថ្ងៃក្ដី ប៉ុន្តែរដ្ឋាភិបាលទាំងសងខាងសុទ្ធតែអះអាងថា ព្យុងយ៉ាង និងមូស្គូ មិនបានចុះកិច្ចព្រមព្រៀងណាមួយ អំឡុងពេលធ្វើទស្សនកិច្ចមួយនេះឡើយ៕