មហាសេដ្ឋីអាមេរិកម្នាក់អះអាងថា ឥណ្ឌាមានសក្ដានុពលដាច់គេ ក្នុងការក្លាយជាមហាអំណាចសេដ្ឋកិច្ច

មហាសេដ្ឋី និងជាវិនិយោគិនអាមេរិក Ray Dalio បាននិយាយថា ឥណ្ឌាមានសក្ដានុពលខ្ពស់​បំផុតក្នុងការក្លាយជាមហាអំណាចសេដ្ឋកិច្ចក្នុងលោក និងបានប្រដូចនាយករដ្ឋមន្ត្រីឥណ្ឌា Narendra Modi ទៅនឹងអតីតមេដឹកនាំចិន Deng Xiaoping ដែលបានកែប្រែសេដ្ឋកិច្ចប្រទេសចិន អំឡុងទសវត្សឆ្នាំ១៩៧០។ នេះបើតាមការចុះផ្សាយពីសារព័ត៌មាន Timesofindia។

“ខ្ញុំគិតថា ឥណ្ឌាគឺដូចចិនកាលពីឆ្នាំ១៩៨៤ អញ្ចឹង បើសិនជាយើងក្រឡេកទៅមើលពីប្រាក់​ចំណូលសព្វថ្ងៃ ហើយខ្ញុំគិតថា Modi គឺដូចជា Deng Xiaoping។ អ្នកអាចមើលឃើញថា ឥណ្ឌាកំពុងមានការកែប្រែ អភិវឌ្ឍន៍ និងការច្នៃប្រឌិតដ៏ខ្ពស់”។ នេះបើតាមសម្ដីរបស់លោក Dalio បានលើកឡើង។

មហាសេដ្ឋីអាមេរិករូបនេះបន្ថែមទៀតថា បញ្ហដែលឥណ្ឌាកំពុងមាន គឺការប្រឆាំងសាសនាមូស្លីម ២៤០លាននាក់ ប៉ុន្តែវាមិនមែនជាឧបសគ្គចំបង រារាំងដល់ការអភិវឌ្ឍន៍សេដ្ឋកិច្ចរបស់ឥណ្ឌានោះឡើយ។

មូលហេតុចំបងដែលវិនិយោគអាមេរិករូបនេះ ហ៊ានអះអាងបែបនេះ ដោយសារលោកយល់ថា មហាអំណាចសេដ្ឋកិច្ចអាមេរិក និងចិនកំពុងមានបញ្ហាជាមួយគ្នា ស្របពេលរុស្ស៊ីជាប់ដៃធ្វើសង្គ្រាមទៀត ដូច្នេះប្រទេសនៅកណ្ដាលដូចជាឥណ្ឌា នឹងសំងំកើបផលប្រយោជន៍បានច្រើនជាមិនខាន៕